သံတွဲမြို့နယ်အတွင်း စစ်ကောင်စီရဲ့နောက်ဆုံးလက်ကျန် တပ်စခန်းတစ်ချို့ကို အပြီးသတ်သိမ်းပိုက်နိုင်ဖို့ ထိုးစစ်ဆင်နေတဲ့ အာရက္ခတပ်တော်(AA)က သံတွဲမြို့နယ်နဲ့ နယ်မြေချင်းထိစပ်နေတဲ့ ဂွနဲ့ တောင်ကုတ်မြို့နယ်တို့ကိုပါ ဆက်လက်တိုက်ခိုက်သွားမယ်လို့ အသိပေးကြေငြာလိုက်ပါတယ်။
ဩဂုတ်လ ၁ ရက် မနေ့က ထုတ်ပြန်တဲ့ သံတွဲ၊ ဂွမြို့ပင်လယ်ပြင်အတွင်း ရေကြောင်းသွားခြင်းမပြုဖို့ သတိပေးတဲ့ ထုတ်ပြန်ချက်ထဲမှာ အဲဒီလို ထည့် သွင်းအသိပေးလာတာဖြစ်ပါတယ်။
"အာရက္ခတပ်တော်ကတော့ သံတွဲကို မပြီးခင်မှာတောင် အခြားတောင်ပိုင်းမြို့တွေကို တစ်ခုပြီး တစ်ခု ဆက်တိုက် မယ်လို့ ယူဆရတယ်၊ ဒီလို ထပ်ကြေငြာတယ်ဆိုကတည်းက သိမ်းဖို့ အဆင် သင့်ဖြစ်နေပြီဆိုတဲ့သဘောပဲ"လို့ ဒေသတွင်း စစ်ရေးအခြေအနေတွေကို စောင့်ကြည့်နေတဲ့ ရခိုင်ဒေသခံတစ်ဦးက ပြောပါတယ်။အာရက္ခတပ်တော်(AA)ဟာ ပြီးခဲ့တဲ့စစ်ရေးသတင်း ထုတ်ပြန်ချက်တွေမှာလည်း ရခိုင်မြို့နယ်အားလုံးရှိ စစ်ကောင်စီတပ်စခန်းအားလုံးကို သိမ်း ပိုက်သွားမယ်လို့ မကြာခဏထုတ်ပြန်ခဲ့ဖူးပြီး အခုတစ်ခါ ထပ်မံအသိပေးလာတာဖြစ်ပါတယ်။
AA ဟာ သံတွဲမြို့ရှိ စစ်ကောင်စီတပ်စခန်းအားလုံး၊ မဇင်လေဆိပ်နဲ့ သံတွဲဟိုတယ်ဇုန်အပါအဝင်နေရာအများစုကို ပြီးခဲ့တဲ့ ဇူလိုင် ၁၆ ရက်နေ့ ညနေ ငါးနာရီခွဲအချိန်မှာ အပြီးသတ်သိမ်း ပိုက်ထားခဲ့ပြီးဖြစ်ကာ ရေတပ်စခန်းနဲ့ စခန်းငယ်အချို့သာ ကျန်တော့တာဖြစ်ပါတယ်။
စစ်ကောင်စီတပ်ကလည်း တောင်ကုတ်နဲ့ ဂွစတဲ့မြို့နယ်တို့အတွင်းရှိ အများပြည်သူသွားရာ လမ်းတစ်လျှောက် ဂိတ်စခန်းတိုးဖွင့်တာ၊ မြို့တွင်းနဲ့ မြို့နီးပတ်လည် နေရာယူတာတွေ ဆက်တိုက်လုပ်ကာ ခံစစ်ပြင်တာတွေ ရှိနေတယ် လို့ ဒေသခံတွေက ပြောကြပါတယ်။
"မြို့နားတွေမှာစစ်ကောင်စီတပ်တွေ ခံစစ်လုပ်နေတယ်၊ လူတွေလည်း ကြောက်နေရတာပေါ့"လို့ တောင်ကုတ်မြို့ခံတစ်ဦးက ပြောပါတယ်။AA က ဆက်လက်ထိုးစစ်ဆင်မယ်လို့ ကြေငြာလိုက်တဲ့ တောင်ကုတ်နဲ့ ဂွမြို့နယ်မှာ စစ်ကောင်စီရဲ့ စစ်ဆင်ရေးကွပ်ကွှဲမှုဌာနချုပ် စကခ ၅ အခြေစိုက်ထားပြီး အဲဒီလက်အောက်ခံ ခြေမြန် တပ်ရင်း လေးခုလည်း ရှိပါတယ်။
စစ်ရှုံးနေတဲ့စစ်ကာင်စီဟာ သံတွဲမြို့ နယ်အတွင်းက ၎င်းတို့လက်လွှတ်လိုက်ရတဲ့တပ်စခန်းတွေနဲ့ သံတွဲမြို့တို့ကို ပြန်လည်ရယူဖို့အတွက် အရပ်သားအသွင်ယူအင်အားဖြည့်တင်းတာတွေကိုလည်း လုပ်ဆောင်နေတယ်လို့ AA ရဲ့ မနေ့က ထုတ်ပြန်ချက်ထဲမှာ ဖော်ပြထားပါတယ်။
ဒါ့အပြင် အရပ်သားအသွင်ဆောင်ကာ ထောက်ပို့လုပ်နေတဲ့ စစ်ကောင်စီအဖွဲ့ ဝင်တွေ၊ တပ်ဆုတ်ထွက်ပြေးနေတဲ့ စစ်ကောင်စီအုပ်စုငယ်တွေနဲ့ သံတွဲမြို့နယ်ငပလီကမ်းခြေမှာရှိတဲ့ ဂျိတ္တော၊ မြပြင်ရပ် ကွက်တွေနဲ့ ရေတပ်စခန်းရှိရာကွင်းဝိုင်းကျေးရွာတွေမှာ ထိတွေ့တိုက်ပွဲတွေ ဆက်လက်ဖြစ်နေဆဲ ရှိနေတယ်လို့လည်း အေအေ ကဆိုပါတယ်။
"ကစဉ့်ကလျား ပြေးနေတဲ့ကောင်တွေက ဟိုအိမ်ဝင်ခိုး၊ ဒီဟာဝင်ခိုးလုပ်နေတာ၊ လူတွေကိုလည်း တွေ့ရင် ပစ်သတ်တယ် ကြားတယ်၊ ရွာကလူတွေကို စိုးရိမ်တယ်"လို့ ငပလီကမ်းခြေ ဂျိတ္တောရွာသား စစ်ရှောင်တစ်ဦးက ပြောပါတယ်။ဒါ့အပြင် စစ်ကောင်စီဟာ အရပ်သားမော်တော်ဘုတ်တွေကို အသုံးပြုပြီးအင်အားဖြည့်တင်းတာ၊ ရိက္ခာနဲ့လက်နက်ဖြည့်တင်းတွေလုပ်ဆောင်နေတဲ့အတွက် သံတွဲနဲ့ဂွ ပင်လယ်ပြင်အတွင်းရှိ အရပ်ဘက်မာ်တော်ဘုတ်တွေ လောင်းလှေများကို ၂၀၂၄ ခုနှစ် ဩဂုတ် ၁ ရက်မှစပြီးအသွားအလာအကန့်အသတ်မရှိ ပိတ်ပင်လိုက်ကြောင်း AA က အရေးပေါ်ထုတ်ပြန်ထားပါတယ်။
အရေးပေါ်ကျန်းမာရေးကိစ္စတွေ ပေါ် ပေါက်လာခဲ့ရင် သက်ဆိုင်ရာ အုပ်ချုပ်ရေးမှုး၊ နယ်မြေမှူးတွေကို ဆက်သွယ်ပြိး သတ်မှတ်ထားသောလမ်းကြောင်း အမှတိအသားများပြုလုပ်ပြီးသွားလာကြဖို့၊ လုံခြုံရေးယူထားတဲ့ နေရာတွေမှာလည်း ကြည်ဖြူစွာအစစ်ဆေးခံကြဖို့ AA ထုတ်ပြန်ချက်မှာ ပါရှိပါတယ်။
ထုတ်ပြန်ချက်ဟာ စတင်ထုတ်ပြတ်တဲ့နေ့မှစပြီး မရုတ်သိမ်းသရွေ့အကျူံးဝင်တဲ့အတွက် သံတွဲနဲ့ဂွရှိပြည်သူတွေအနေနဲ့ ပင်လယ်ပြင်အတွင်း လုံးဝအ သွားအလာ မလုပ်ကြဖို့လည်း ဆိုပါတယ်။
