မာန်အောင် နဲ့ ကျောက်ဖြူကဒေသခံတွေကိုစစ်ကောင်စီက ငါးဖမ်းခွင့်ပိတ်ပင်ထားပေမယ့် ပြည်မက ငါးဖမ်းစက်လှေတွေငါးဖမ်းခွင့်ရနေ

CNA၊ဟိန်းဆက်။

မာန်အောင်နဲ့ ကျောက်ဖြူမြို့နယ်က ဒေသခံတွေကို စစ်ကောင်စီက ငါးဖမ်းခွင့်ကို တားမြစ်ပိတ်ပင်ထားပေမယ့် ပြည်မက လာတဲ့ ငါးဖမ်းစက်လှေတွေကို ငါးဖမ်းခွင့်ပြုထားတာတွေရှိနေတယ်လို့ ဒေသခံတွေကပြောပါတယ်။

ကျောက်ဖြူ နဲ့ မာန်အောင်ကြားက ပင်လယ်ပြင်တွေမှာ ပြည်မကလာတဲ့ ငါးဖမ်းစက်လှေတွေကို စစ်ကောင်စီရေတပ်တွေက လုံခြုံရေးပေးကာ ငါးဖမ်းခွင့်ကို အပြည့်အဝကာကွယ်ပေးပြီး ငါးဖမ်းတာတွေကို နေ့စဉ်ရက်ဆက်လုပ်ဆောင်နေတာတွေရှိနေတာဖြစ်တယ်လို့ ဒေသခံရေလုပ်ငန်း လုပ်ကိုင်သူ မာန်အောင်အောင်ဒေသခံ တစ်ဦးကပြောပါတယ်။

“ကျနော်တို့ ဒေသခံတွေကိုသာ ငါးမဖမ်းရ ပင်လယ်ပြင်မထွက်ရလို့အမိန့်ထုတ်ပြီးပိတ်ပင်ထားတာ အနှစ်နှစ်အလလရှိနေပြီ။ထွက်ရင်လည်း လက်နက်ကြီးတွေ နဲ့လှမ်းပစ်တာတွေ ရှိတယ်။ဘယ်သူမှမထွက်ရဲကြဘူး။ပြည်မကလာတဲ့ ငါးဖမ်းလှေကြီးတွေတို ကျနော်တို့ မာန်အောင် ကျွန်းအောက်အထိကို လာဖမ်းတယ် နေဗီတွေက လုံခြုံရေးပေးထားတယ်”လို့သူကပြောပါတယ်။

မာန်အောင်မြို့နယ် အတွင်းက ငါးဖမ်းလုပ်ငန်းလုပ်ကိုင်သူ နဲ့ ကျောက်ဖြူမြို့နယ် အတွင်းက ငါးဖမ်းလုပ်ငန်းလုပ်ကိုင်သူတွေကို စစ်ကောင်စီက ငါးဖမ်းခွင့်ပိတ်ပင်ထားတာဟာ နှစ် နဲ့ချီကြာမြင့်နေပြီး ဖြစ်သလို အဲဒီလို ရက်ရှည်လများ ငါးဖမ်းခွင့်တွေကို ပိတ်ပင်ထားတာကြောင့် ဒေသခံ ရေလုပ်သားတွေဟာ စားဝတ်နေရေး အခက်အခဲများစွာနဲ့လည်း ရင်ဆိုင်နေကြရတာပါ။

ဒါ့အပြင် စစ်ကောင်စီဟာ ပြီးခဲ့တဲ့ ဇူလိုင်လ ၁၅ ရက်နေ့ကတည်းကပင် စက်တင်ဘာလ ၃၀ ရက်နေ့အထိ သံဇစ်မြစ်ကို တူးဖော်ဖို့ရှိနေတာကြောင့်ငါးဖမ်းလှေတွေ အပါအဝင် ဒေသခံစက်လှေတွေ သံဇစ်မြစ်အနီးက နေရာတွေကို ဖြတ်သန်းသွားလာတာ မလုပ်ဖို့ တားမြစ်ကန့်သတ် တာတွေကို လုပ်ဆောင်တာ ရှိခဲ့ပါတယ်။

ဒါပေမယ့် လက်ရှိပြည်မကလာတဲ့ ငါးဖမ်းလှေတွေကိုတော့ အဲဒီသံဇစ်မြစ်အနီးဝန်းကျင်းကနေရာတွေမှာ နေဗီများစွာနဲ့ ကာရံကာ ငါးဖမ်းခွင့်တွေကိုပေးထားတာတွေ မြင်တွေ့နေရတယ်လို့ ကျောက်ဖြူမြို့နယ် အတွင်းက ရေလုပ်ငန်းလုပ်ကိုင်သူ တစ်ဦးကပြောပါတယ်။

“ကျနော်တို့ဒေသခံတွေကိုသာ အဲဒီသံဇစ်မြစ်အနားကို မသွားရ ငါးမဖမ်းရလို့သာပြောတာ သူတို့ အခုပြည်မက လာတဲ့ ငါးဖမ်းလှေတွေ အဲဒီနားမှာ နေဗီတွေလုံခြုံရေးအပြည့်ပေးပြီးတော့ ငါးဖမ်းနေတာတွေ အများကြီး။ဘယ်လိုတွေကြောင့်ဖမ်းရတယ်ဆိုတာတော့ ကျနော်တို့ကတော့ မသိဘူး။ဒီလိုလုပ်ရပ်က သစ်အဆင်မပြေဘူး မဖမ်းရလို့ တာ့မြစ်ထားရင် ဘယ်သူ့ကိုမှဖမ်းခွင့်မပေးနဲ့ ရခိုင်ပင်လယ်ပြင်မှာ ရခိုင်တွေက ငါးမဖမ်းရ ပြည်မက ဆိုရင်လာဖမ်းရတယ်ဆိုတာက ငါတို့အာဏာရှိတာ ငါတို့ လုပ်ချင်သလို လုပ်လို့ရတယ်ဆိုတဲ့ သဘောကို လုပ်နေတာ ဖြစ်တယ်လို့“သူကပြောပါတယ်။

စစ်ကောင်စီဟာ ကျောက်ဖြူ နဲ့ မာန်အောင်မြို့နယ်တွေက ဒေသခံတွေကို ပြီးခဲ့တဲ့ ၂၀၂၃ ခုနှစ် နိုဝင်ဘာလ ကတည်းကပင် ငါးဖမ်းခွင့် နဲ့ ပင်လယ်ပြင်ထွက်ခွင့်တွေကို တားမြစ်ကန့်သတ်ခဲ့တာဖြစ်ပြီး လက်ရှိ ငါးဖမ်းခွင့် ပိတ်ပင်ထားတာဟာ တစ်နှစ် နီးပါးထိရှိလာနေပြီလည်း ဖြစ်ပါတယ်။