ရွှေသောင်ယံကို ရောက်နေကြတဲ့ ရခိုင်ရေလုပ်သားတွေကို စစ်ကောင်စီကတားမြစ်ကန့်သတ်မှု နဲ့ ဖိအားပေး ရွှေ့ပြောင်းခိုင်းမှုတွေ လုပ်နေ

CNA၊မြတ်သူ။

ဧရာဝတီတိုင်း ၊ပုသိမ်မြို့နယ်၊ရွှေသောင်ယံမြို့ ကို ဂွကနေတဆင့် ရေလုပ်ငန်းလုပ်ကိုင်ဖို့ လာရောက်ကြတဲ့ ရခိုင်ရွှေ့ပြောင်း ရေလုပ်သားတွေကို စစ်ကောင်စီက ငါးဖမ်းထွက်ခွင့်မပြုတဲ့ အပြင် အဲဒီနေရာတွေမှာလည်း နေထိုင်ခွင့်မပြုဘူးလို့စစ်ကောင်စီက ဖိအားပေးပြောင်းရွှေ့ခိုင်းတာတွေ လုပ်ဆောင်နေတယ်လို့ ဧရာဝတီရောက် ရခိုင်ရေလုပ်သားတွေက ပြောပါတယ်။

ပြီးခဲ့တဲ့ ဒီဇင်ဘာလ ၁၄ ရက်နေ့မှာ ရွှေသောင်ယံမြို့ နယ်အုပ်ချုပ်ရေးမှူး၊ခရိုင်အုပ်ချုပ်ရေးမှူးအပါအဝင် ခရိုင်ရဲမှူးတို့က ရွှေသောင်ယံမြို့နယ် အတွင်းက ရောက်ရှိနေတဲ့ ရခိုင်ရေလုပ်သားတွေကို ထွေအုပ်ရုံးအတွင်းသို့ခေါ်ယူကာ အခုလိုပြောဆိုခဲ့တာ ဖြစ်တယ်လို့ ဧရာဝတီတိုင်း၊ပုသိမ်မြို့နယ်၊ရွှေသောင်ယံမြို့ကို ရောက်နေတဲ့ ရခိုင်ရေလုပ်သား တစ်ဦးက အခုလိုပြောပါတယ်။

“ကျနော်တို့ကို ၁၄ ရက်နေ့မှာ ထွေအုပ်ရုံးကိုခေါ်ပြောတယ် ဒီနေရာမှာ နေလို့ မရဘူး အကုန်လုံးပြောင်းရမယ်ပြောတယ်။ပြောင်းမယ့်နေရာ မရှိတဲ့ သူတွေကတော့ ဖျာပုံမြို့နယ်အတွင်းက သူတို့ ထားတဲ့ ခမာရွာဆိုတဲ့နေရာမှာနေရမယ်ပြောတယ်။ဆိုလိုချင်တာကဗျာ ချောင်းသာ နဲ့ ရွှေသောင်ယံမြို့မှာ မနေ နဲ့ အဲဒီလို နှင်ထုတ်တာပေါ့ဗျာ။တစ်ပတ်အတွင်းရွှေ့ရမယ်ပြောတယ်။ ကျနော်တို့က ပြောင်းဖို့ အဆင်မပြေဘူး ပြန်ပြောတော့ သူတို့က ပြန်ပြောတယ် နေခွင့်တော့ ရရှိရင်ရှိမယ် အလုပ်လုပ်လို့ မရဘူးလို့ ထပ်ပြောလာတယ်။အခုဖြစ်နေတာက သူတို့က ၁၁ / ဖြစ်ရင် နေထိုင်ခွင့်ရော အလုပ်လုပ်ကိုင်ခွင့်ရော မပေးဘူးဆိုတာမျိုးကို လုပ်နေတာ ဖြစ်တယ်လို့”သူကပြောပါတယ်။

လက်ရှိ ရွှေသောင်ယံမြို့နယ် အတွင်းမှာ ရောက်ရှိနေကြတဲ့ ရေလုပ်ငန်းလုပ်ကိုင်သူ အများစုဟာ နှစ်စဉ်နှစ်တိုင်းလည်း ဒီနေရာ အတွင်းမှာ အစိုးရကို အခွန်ဆောင်ပြီးတော့ လာရောက်လုပ်ကိုင်နေကြတဲ့သူတွေဖြစ်ကြပြီး ဒီနှစ်မှာတော့ အဲဒီရွှေ့ပြောင်းရေလုပ်သားတွေကိုစစ်ရှောင်တွေ ဆိုတဲ့ အမည်တပ်ကာ ရခိုင်ရေလုပ်သားတွေကိုအခုလို ကန့်သတ်တားမြစ်လိုက်တာ ဖြစ်တယ်လို့ ဆိုပါတယ်။

အဲဒီလိုရခိုင်ရေလုပ်သားတွေကို စစ်ကောင်စီက ရေလုပ်ငန်းလုပ်ကိုင်ခွင့်မရှိဘူးလို့ ကန့်သတ်တားမြစ်ထားတဲ့ အတွက် ရေလုပ်သားအများစုဟာလက်ရှိမှာ စားဝတ်နေရေး အခက်အခဲတွေ နဲ့ ရင်ဆိုင်နေကြရပြီး ဖြစ်သလို ရေလုပ်ငန်းပိုင်ရှင်တွေအနေ နဲ့လည်း အခက်အခဲ များစွာ နဲ့ ရင်ဆိုင်နေကြရပြီးဖြစ်တယ်လို့ ရွှေသောင်ယံမြို့ ကို ရောက်ရှိနေတဲ့ ဂွမြို့နယ် အတွင်းက ရွေ့ပြောင်းရေလုပ်သား တစ်ဦးက ပြောပါတယ်။

“အခုကျနော်တို့အခုပိတ်မထွက်ရတော့ ပါလာတဲ့ လုပ်သားတွေ အကုန်လုံးကို ပိုင်ရှင်တွေက တင်ကျွေးထားရတယ်။အဆင်မပြေဘူး။ပြီးတော့ လုပ်ငန်းလုပ်ဖို့က အခွန်ဆောင်တာဘာညာ အကုန်လုံးကို ကျနော်တို့က ငွေးတိုး နဲ့ချေးပြီးလုပ်ထားရတာ၊ကျနော်တို့ လုပ်သားတွေ အကုန်လုံးမှာလည်း ရေလုပ်သားကဒ်တွေ အကုန်လုံးရှိတယ်။အခု အဲဒါကို သူတို့က စစ်ရှောင်ဆိုတဲ့ အမည်ကို သုံးပြီးတော့ ဘာမှလုပ်ခွင့်မပေးပဲ လူမျိုးရေး အရ ကန့်သတ်ထားတာဖြစ်တယ်လို့”သူကပြောပါတယ်။

အဲဒါကြောင့်လက်ရှိရခိုင်က ရွေ့ပြောင်းလုပ်ငန်းလုပ်ကိုင်နေတဲ့ ရေလုပ်သားတွေအပေါ် စစ်ကောင်စီက တားမြစ်ကန့်သတ်မှုလုပ်ဆောင်နေတာတွေကို ဖြေလျှော့ပေးဖို့ လိုအပ်နေတယ်လို့လည်း ရခိုင်ရွှေ့ပြောင်းရေလုပ်သားတွေက တောင်းဆိုကြပါတယ်။