မြန်မာ – ဘင်္ဂလားဒေရှ့်နယ်စပ်၊ နတ်မြစ်အတွင်းမှာ ငါးဝင်ဖမ်းတဲ့ ဘင်္ဂလားဒေ့ရှ် ငါးဖမ်းသမား ၁၉ ဦးကို အာရက္ခတပ်တော်(AA)က ဖမ်းဆီးသွားတယ်လို့ ဘင်္ဂလားဒေ့ရှ်သတင်းတွေက ဖော်ပြပါတယ်။
ဒီဖြစ်စဥ်ဟာ ဖေဖော်ဝါရီ ၂၀ရက်နေ့ မနက်ပိုင်းလောက်မှာ ဖြစ်ပွားခဲ့တာဖြစ်ပြီး ငါးဖမ်းလှေ ၄ စီး နဲ့အတူ ငါးဖမ်းပြီးပြန်လာတဲ့ ငါးဖမ်းသမား ၁၉ ဦးကို နတ်မြစ်အတွင်းမှာ ဖမ်းဆီးခံခဲ့ရတာဖြစ်တယ်လို့ ဆိုပါတယ်။
“ငါးဖမ်းသင်္ဘော ၄ စီးနဲ့ ငါးဖမ်းသမား ၁၉ ဦးကို ဖမ်းဆီးခ့ရတဲ့ ကိစ္စနဲ့ပတ် သက်ပြီး သတင်းအရင်းအမြစ် အမျိုးမျိုးကနေ ကျွန်တော်တို့ ရထားတယ်။ BGB နှင့် ညှိနှိုင်းပြီးတော့ ဖမ်းခံထားရတဲ့ သူတွေ ကို ပြန်လွတ်မြောက်လာနိုင်ဖို့အတွက် ကြိုးပမ်းမှုတွေ လုပ်နေတယ်”လို့ Teknaf Upazila Nirbahi Officer (UNO) Sheikh Ehsan Uddin ကပြောပါတယ်။
ငါးဖမ်းလှေ ၄စီးအနက် ၂စီးဟာ Teknaf’s Kayukkhali Ghatကဖြစ်ပြီး ကျန် ၂စီးကတော့ Shah Porir Dwip Ghatက ဖြစ်တယ်လို့ ဘင်္ဂလားဒေ့ရှ်နိုင်ငံ သတင်းတွေမှာ ဖော်ပြထားပါတယ်။
ဘင်္ဂလားဒေ့ရှ် နယ်ခြားစောင့်တပ် (BGB)က အမည်မဖော်လိုတဲ့ အကြီးတန်း အရာရှိတစ်ဦးကတော့ အဖမ်းခံရသူတွေကို ပြန်ခေါ်နိုင်ဖို့ အားထုတ်နေတယ်လို့ ပြောတဲ့အကြောင်း ဘင်္ဂလားဒေ့ရှ်သတင်းတွေက ဖော်ပြပါတယ်။
“ငါးဖမ်းသမားများကို ၎င်းတို့၏ လှေများနှင့်အတူ နတ်မြစ်ထဲကနေ ဖမ်းဆီးခေါ်ဆောင်သွားကြောင်း သတင်းရရှိသည်။ ထိုဖြစ်ရပ်နောက်ကွယ်ကအကြောင်းရင်းများကို ကျွန်ုပ်တို့ စုံစမ်းစစ်ဆေးနေပြီး ၎င်းတို့ကို အမြန်ဆုံး ပြန်လည်ခေါ်ဆောင်ရန် အားထုတ်မှုများ ပြုလုပ်နေပါသည်”လို့ ဆိုပါတယ်။
လက်ရှိမှာတော့ အဖမ်းခံရတဲ့ ငါးဖမ်းသမားတွေရဲ့ မိသားစုတွေဟာလည်း စိုးရိမ်မှုတွေရှိနေကြပြီး ဒီလိုသာ ဆက်တိုက်ဖမ်းဆီးခံရမှုတွေ ရှိနေရင် ဒေသခံ ငါးဖမ်းသမားတွေအနေ နဲ့ ပင်လယ်ပြင်ထွက် ငါးဖမ်းလုပ်ငန်းလုပ်ကိုင်တာ ရပ်တန့်မှုရှိလာနိုင်ပြီး ဒီကိစ္စကို ဘင်္ဂလားဒေ့ရှ်အစိုးရ အနေ နဲ့ ဖြေရှင်းပေးဖို့ လိုအပ်နေတယ်လို့လည်း ဆိုပါတယ်။
ပြီးခဲ့တဲ့ ၂၀၂၄ခု နှစ် အောက်တိုဘာလ ၁၅ရက်နေ့တုန်းကလည်း အာရက္ခရေပိုင်နက်အတွင်းကိုကျူးကျော်ဝင်ရောက်ပြီး ငါးဖမ်းနေတဲ့ ဘင်္ဂလားဒေ့ရှ် နိုင်ငံသား ငါးဖမ်းသမား ၁၆ ဦးကို အာရက္ခတပ်တော်က ဖမ်းဆီးစစ်ဆေးပြီး ခံဝန်ကတိထိုးခိုင်ကာဘင်္ဂလားဒေ့ရှ် နယ်ခြားစောင့်တပ် (BGB)ထံကို အာရက္ခတပ်တော်က ပြန်လည်လွဲပြောင်းပေးခဲ့တာ ရှိခဲ့ပါတယ်။
ဘင်္ဂလားဒေ့ရှ်ငါးဖမ်းသမား ၁၉ ဦးကို ဖမ်းဆီးတဲ့ကိစ္စနဲ့ပတ်သက်ပြီး အာရက္ခတက်တော်(AA)ဘက်ကတော့ ဒီကနေ့ ဖေဖော်ဝါရီ ၂၀ရက်၊ ညပိုင်းအထိ တစုံတရာထုတ်ပြန်လာတာမျိုးမတွေ့ရသေးပါဘူး။
