အာရက္ခရေပိုင်နက်အတွင်းကို ကျူးကျော်ဝင်ရောက်ပြီး ငါးဖမ်းခဲ့တဲ့ ဘင်္ဂလားဒေ့ရှ်နိုင်ငံသား ငါးဖမ်းသမား ၂၉ ဦး ကို အာရက္ခတပ်တော်က ဖမ်းဆီးစစ်ဆေးပြီးနောက် ဘင်္ဂလားဒေ့ရှ် နယ်ခြားကာကွယ်ရေးတပ်ဖွဲ့ (BGB) ဆီကို ပြန်လည်လွဲပြောင်းပေးအပ်ခဲ့တယ်လို့ ဘင်္ဂလားဒေ့ရှ်နိုင်ငံ သတင်းတွေက ဖော်ပြပါတယ်။
အဲဒီ ဘင်္ဂလားဒေ့ရှ်နိုင်ငံသား ငါးဖမ်းသမား ၂၉ ဦးဟာ ပြီးခဲ့တဲ့ ဖေဖော်ဝါရီလ ၁၁ နေ့ နဲ့ ၂၀ ရက်နေ့တွေမှာ အာရက္ခရေပိုင်နက်ဖြစ်တဲ့ နတ်မြစ်အတွင်းကို ကျူးကျော်ဝင်ရောက်ပြီး ငါးဖမ်းခဲ့တာကြောင့် အာရက္ခတပ်တော် ရဲ့ ကမ်းခြေစောင့်တပ်ဖွဲ့တွေက ဖမ်းဆီးခဲ့ရတာလည်း ဖြစ်ပါတယ်။
အဲဒီဖမ်းဆီခံရသူတွေကို အာရက္ခတပ်တော်က တစ်ပတ်ကျော်အကြာစစ်ဆေးမေးမြန်းပြီးနောက် ဖေဖော်ဝါရီလ ၂၇ ရက်နေ့ မှာတော့ င်္ဂလားဒေ့ရှ် နယ်ခြားကာကွယ်ရေးတပ်ဖွဲ့ (BGB) ဆီကို အာရက္ခတပ်တော်က ပြန်လည်လွဲပြောင်းပေးအပ်ခဲ့ပြီးနောက် ညနေမှာ ဘင်္ဂလားဒေ့ရှ်နိုင်ငံ တက္ကနတ်ဆိပ်ကမ်းကို အဲဒီ ငါးဖမ်းသမား ၂၉ ဦးဟာ ပြန်လည် ရောက်ရှိလာခဲ့တယ်လို့ ဆိုပါတယ်။
အဲဒီနောက် ပြန်လည်လွတ်မြောက်လာသူတွေကို ဘင်္ဂလားနိုင်ငံ နယ်ခြားကာကွယ်ရေးတပ်ဖွဲ့ (BGB) က မိသားစုဆီကို ပြန်လည်လွဲပြောင်းပေးအပ်ခဲ့တယ်လို့လည်း သတင်းမှာ ဖော်ပြထားပါတယ်။
ဒါ့အပြင် လက်ရှိမှာတော့ ဖမ်းဆီးခံရချိန်မှာ အတူပါသွားတဲ့ ငါးဖမ်းစက်လှေ နဲ့ ငါးဖမ်းပိုက်တွေကိုတော့ အာရက္ခတပ်တော်က ဆက်လက်သိမ်းထားဆဲ ဖြစ်တယ်လို့လည်း ဖော်ပြထားပါတယ်။
ဒီအခြေအနေ နဲ့ ပတ်သက်လို့တော့ အာရက္ခတပ်တော်က တစ်စုံတရာထုတ်ပြန်ပြောဆိုလာတာမျိုးတော့ မတွေ့ရသေးပါဘူး။
ဘင်္ဂလားဒေ့ရှ်နိုင်ငံ အတွင်းက ငါးဖမ်းလုပ်သားတွေဟာ အာရက္ခရေပိုင်နက်အတွင်းကို နေ့စဉ်နဲ့ အမျှ ကျူးကျော်ဝင်ရောက်ကာ ငါးဖမ်းဆီးတာတွေ ရှိတဲ့ အတွက် အဲဒီလိုကျူးကျော်ဝင်ရောက် ငါးဖမ်းသူတွေကို အာရက္ခတပ်တော် ကမ်းခြေစောင့်တပ်ဖွဲ့တွေက မကြာခဏဆိုသလို ဖမ်းဆီးစစ်ဆေးပြီးနောက် ခံဝန်ကတိထိုးကာ ပြန်လွတ်ပေးတာတွေကိုလည်း အရင်တုန်းကတည်းကပင် ဆက်တိုက်ရှိနေတာလည်း ဖြစ်ပါတယ်။
