CNA ၊မြတ်သူ။
မာန်အောင်မြို့နယ်အတွင်းက စားဝတ်နေရေး အတွက် ငါးရှာထွက်သွားတဲ့ ဒေသခံပြည်သူ ရေလုပ်သား ၅ ဦးဟာ မိသားစုတွေ နဲ့ အဆက်အသွယ် မရဘဲ ရက်ပေါင်း ၁၀ ကြာတဲ့ အထိပျောက်ဆုံးနေတယ်လို့ ပျောက်ဆုံးနေတဲ့ သူတွေ ရဲ့ မိသားစုဝင်တွေက ပြောဆိုပါတယ်။
ပျောက်ဆုံးနေသူ ၅ ဦးကတော့ မာန်အောင်မြို့ ရေမျက်ဝကျေးရွာက ငါးဖမ်းစက်လှေပိုင်ရှင် ဦးစိုးမြင့် အပါအဝင် နောက်ထပ် မာန်အောင်ဒေသခံ ၅ ဦးဖြစ်တယ်လို့ ဆိုပါတယ်။
အဲဒီ ငါးဖမ်းစက်လှေပိုင်ရှင် ဦးစိုးမြင့် အပါအဝင် ဒေသခံ ရေလုပ်သား ၅ ဦးဟာ စားဝတ်နေရေး အဆင်မပြေတဲ့ အတွက် ပြီးခဲ့တဲ့ ဖေဖော်ဝါရီလ ၂၁ ရက်နေ့ကတည်းကပင် ငါးဖမ်းထွက်သွားခဲ့တာဖြစ်ပြီး အဲဒီနောက် ဖေဖော်ဝါရီလ လကုန်ထိ အဆက်အသွယ် ရရှိပြီးနောက်မှာတော့ အဆက်အသွယ် မရတော့ပဲ ပျောက်ဆုံးသွားခဲ့တာ ဖြစ်တယ်လို့ ဦးစိုးမြင့် မိသားစုဝင် တစ်ဦးကပြောပါတယ်။
“အခုက စားဝတ်နေရေးကလည်း ခက်ခဲကုန်စေ◌ျးနူန်းတွေကလည်းတက် ရေလုပ်ငန်းတွေကလည်း မလုပ်ရဘူးပိတ်ထားတော့ စားဝတ်နေရေး လုံးဝအဆင်မပြေတော့လို့ ငါးဖမ်းမယ်ဆိုပြီးထွက်သွားတာပါ သူတို့ထွက်သွားတာက ဖေဖော်ဝါရီ ၂၁ ရက်နေ့ကတည်းကပင် ထွက်သွားတာ အဲဒီနောက် ဖေဖော်ဝါရီလကုန်တဲ့ အဖိ အဆက်အသွယ်ရလိုက်သေးတယ် အဲဒီတုန်းကတော့ နံသားကျွန်းနားမှာ ရောက်နေတယ်လို့ ပြောတယ်။ အဲဒီနောက်ပိုင်း အဆက်အသွယ်မရ လိုက်တော့ဘူး”လို့သူကပြောပါတယ်။
စစ်ကောင်စီဟာ ရခိုင်တကျော့ပြန်တိုက်ပွဲ ဖြစ်ပွါးချိန်ကတည်းကပင် မာန်အောင်မြို့နယ်အတွင်းက ဒေသခံတွေကို ငါးဖမ်းခွင့် ကန့်သတ်ပိတ်ပင်တားမြစ်ထားတာဟာ တစ်နှစ်ကျော်အထိ ကြာမြင့်နေပြီလည်း ဖြစ်ပါတယ်။
အဲဒီလို စစ်ကောင်စီက ငါးဖမ်းခွင့်တွေကို ဆက်တိုက်ပိတ်ပင်တားမြစ်ထားတာကြောင့် ရေလုပ်ငန်းကို အမှီပြုပြီးတော့နေ့စဉ်စားဝတ်နေရေးကို ဖြေရှင်းနေကြရတဲ့ မာန်အောင်ဒေသခံတွေဟာ စားဝတ်နေရေး အဆင်မပြေ ဖြစ်လာတဲ့ အတွက် စားဝတ်နေရေး အဆင်ပြေအောင် စစ်ကောင်စီတပ်တွေ မသိရလေအောင် ငါးဖမ်း ခိုးထွက်တာကို လုပ်ဆောင်လာကြရတာလည်း ဖြစ်ပါတယ်။
လက်ရှိ ငါးဖမ်းသွားတဲ့ ငါးဖမ်းစက်လှေပိုင်ရှင် ဦးစိုးမြင့် အပါအဝင် ရေးလုပ်သား ၅ ဦး ကို ဆယ်ရက်ကြာထိ အဆက်အသွယ်မရ ဖြစ်နေတဲ့ အပေါ်မှာ မိသားစုတွေ အနေ နဲ့ အထူးစိုးရိမ်နေကြရပြီး တွေ ရှိသူတွေ အနေ နဲ့ ကယ်တင်ပေးကြဖို့ကို တောင်းဆိုတယ်လို့ ငါးဖမ်းစက်လှေပိုင်ရှင် ဦးစိုးမြင့် မိသားစုဝင်တစ်ဦးက တောင်းဆိုပါတယ်။
“ကျမတို့ အခုက ဘယ်မှာမှန်းလည်း မသိ ဘယ်ရောက်နေကြမှန်းလည်း မသိတော့ စိုးရိမ်တာကလွဲရင်ဘာမှ မတတ်နိုင်ဘူး ။တွေ့တဲ့ သူတွေ အနေ နဲ့ သူတို့ကို ကယ်တင်ပြီးတော့ မိသားစုကို အကြောင်းကြားဖို့ကပဲ တောင်းဆိုပါတယ်”လို့ သူကတောင်းဆိုပါတယ်။
ရခိုင်ပြည်အတွင်းက စစ်တွေ နဲ့ကျောက်ဖြူမြို့နယ် အတွင်းမှာ စစ်ကောင်စီတပ်တွေ နဲ့ အာရက္ခတပ်တော်တို့ နှစ်ဖက်တိုက်ပွဲ ဖြစ်ပွါးပြီးနောက်ပိုင်းမှာ စစ်ကောင်စီတပ်တွေဟာ မာန်အောင် ပင်လယ်ပြင် အနီးမှာ ရေတပ်သင်္ဘောတွေကို အင်အားဖြည့်တင်းတာတွေကိုလည်း များစွာလုပ်ဆောင်ထားကြောင်းသိရပါတယ်။
