CNA ၊ မြတ်သူ။
ဂွ နဲ့ သံတွဲမြို့တွေက အရေပြားရောဂါ ဝေဒနာတွေကို ခံစားနေကြရတဲ့ စစ်ဘေးရှောင်ပြည်သူတွေ အနေ နဲ့ နောက်ထပ် အရေပြားရောဂါ ပြန့်ပွားကူးစက်မှု မဖြစ်လာနိုင်အောင်အတွက် အာရက္ခပြည်သူ့ကျန်းမာရေးဌာနအနေ နဲ့ မြေပြင်ကွင်းဆင်းစစ်ဆေးကာ ဆေးဝါးကုသပေးတာတွေလုပ်ဆောင်ပေးစေချင်တယ်လို့ ဒေသခံ စစ်ဘေးရှောင်ပြည်သူတွေ နဲ့ စစ်ဘေးရှောင်ကူညီရေးလုပ်ဆောင်နေသူတွေကတောင်းဆိုနေကြပါတယ်။
သံတွဲ နဲ့ ဂွမြို့နယ်တွေက စစ်ဘေးရှောင်စခန်းတွေမှာ ပြီးခဲ့တဲ့ လပိုင်းကတည်းကပင် အရေပြားရောဂါ ဖြစ်ပွါးမှု အခြေအနေတွေဟာ သိသိသာသာ တိုးလာနေတာကို လည်း မြင်တွေ့လာနေကြရတယ်လို့ စစ်ဘေးရှောင် အရေးဆောင်ရွက်နေသူတွေက ပြောပါတယ်။
အဲဒီလို အရေပြားရောဂါ ဖြစ်ပွါးသူတွေ တိုးလာနေတာကြောင့် နောက်ထပ်ပြည်သူတွေဆီကို ကူးစက်ပြန့်ပွါးမှု ထပ်မဖြစ်လာအောင် အာရက္ခပြည်သူ့ကျန်းမာရေးဌာနအနေ နဲ့ မြေပြင်ကို ကွင်းဆင်းစစ်ဆေးကာ ရောဂါရဲ့ ဇစ်မြစ်အခြေအနေကို ဆန်းစစ်ကာ ဆေးဝါးကုသပေးတာတွေ လုပ်ဆောင်ပေးဖို့ လိုအပ်နေတယ်လို့ သံတွဲမြို့နယ် အတွင်းက စစ်ဘေးရှောင်အရေး ကူညီဆောင်ရွက်ပေးနေသူ တစ်ဦးက တောင်းဆိုပါတယ်။
“တော်တော်များမျာက အခုပိုဖြစ်လာတာကိုတွေ့နေရတယ် အနာတွေကလည်း အရည်တွေပါ စီးကျနေတော့ တနေရာကနေ တနေရာကို ကူးစစ်ပြန့်ပွါးဖို့ လွယ်သလို တစ်ဦးကနေတစ်ဦးကိုလည်း ကူးစက်ပြန့်ပွါးဖို့က တော်တော်လွယ်တယ်။ဘာကြောင့်ဖြစ်တာလဲဆိုတာကိုတော့ ကျနော်တို့လည်း တိတိကျကျမသိပေးမယ့် ခန်းမှန်းသလောက် စစ်ရှောင်စခန်းတွေမှာ လူထူထပ်တာ နောင်တစ်ခုက နေရာထိုင်ခင်း နဲ့ ရေတို့ မသန့်ရှင်းတာ အစာအဟာရ မပြည့်ဝတာတွေကြောင့်လို့တော့ ထင်တယ်” လို့ သူကဆိုပါတယ်။
အဲဒါကြောင့်လက်ရှိဖြစ်ပွါးနေတဲ့ ရောဂါအခြေအနေ နဲ့ ဇစ်မြစ်ကို သိရှိနိုင်အောင် အာရက္ခပြည်သူ့ကျန်းမာရေးဌာနက တာဝန်ရှိသူတွေ အနေ နဲ့ မြေပြင်ကွင်းဆင်း စစ်ဆေးကာ ဆေးကုသပေးတာတွေ လုပ်ဆောင်ပေးဖို့ အတွက် စစ်ဘေးရှောင်ပြည်သူတွေ အနေ နဲ့ လိုလားနေကြတာ ဖြစ်တယ်လို့လည်း သူကဆိုပါတယ်။
စစ်ဘေးရှောင်ကူညီစောင့်ရှောက်ရေး ဖွဲ့တွေ အနေ နဲ့ စစ်ဘေးရှောင်ပြည်သူတွေ ခံစားနေရတဲ့ အရေပြားရောဂါဝေဒနာတွေ သက်သာပျောက်ကင်းနိုင်အောင် ဆိုတဲ့ ရည်ရွယ်ချက် နဲ့ ယားနာပျောက်ဆေးတွေကို ဝယ်ယူထောက်ပံ့တာတွေ လုပ်ဆောင်ပေးနေပေမယ့် အနာ နဲ့ ဆေးမသင့်တဲ့အတွက် မကောင်းဘဲ ပိုဆိုသွားတဲ့ သူတွေလည်း ရှိနေတယ်လို့ ဂွမြို့နယ်အတွင်းက စစ်ဘေးရှောင်အရေး ကူညီဆောင်ရွက်ပေးနေသူ တစ်ဦးက ပြောပါတယ်။
“ကျနော်တို့ ဂွ နဲ့ ကျိန္တလီ ပေါင်းရင် အရေပြားရောဂါဖြစ်နေတဲ့ သူက လူဦးရေ ၂၀၀၀ ကျော်လောက်တော့ ရှိတယ် ကျနော်တို့ အခုလိမ်းဆေးတွေ လှူပေးတာ လူဦးရေ ၁၀၀၀ ကျော်လောက်ကိုတော့ လှူပေးထားနိုင်ပြီးပြီ။တချို့က ကျနော်တို့ပေးတဲ့ ဆေးနဲ့တည့်တယ် တချို့ကမတည့်ဘူး ကျနော်တို့ကလည်း ဆေးပညာရှင်တွေ မဟုတ်တော့ ဘာဆေးနဲ့ တည့်မတည့်ကိုလည်း မသိတော့တော်တော်ခက်တယ်။ကူညီဖို့တွက်ကတော့ တော်တော်လိုအပ်နေသေးတယ် ။ အဲဒီလို အာရက္ခပြည်သူ့ကျန်းမာရေးဌာနက ကွင်းဆင်းကုသပေးတယ်ဆိုတော့ အရမ်းကောင်းတဲ့အစီအစဉ်ပေါ့ ကျနော်တို့လည်း ပူးပေါင်းပြီးတော့ လုပ်ဆောင်ပေးလို့ ရတယ်”လို့ သူကပြောပါတယ်။
လက်ရှိမှာတော့ အရေပြားရောဂါ ခံစားနေရတဲ့ပြည်သူတွေကို ရောဂါဝေဒနာ သက်သာပျောက်ကင်းစေဖို့ အတွက် စစ်ဘေးရှောင်ကူညီရေးအဖွဲ့တွေ အနေ နဲ့သာ ကိုယ်ထူကိုယ်ထစနစ် နဲ့ လက်ကမ်းဆေးတွေ ဖြန့်ဝေတာတွေကို လုပ်ဆောင်နေရပြီး အာရက္ခပြည်သူ့အစိုးရကတော့ ဒီရောဂါ နဲ့ ပတ်သက်ပြီး ကွင်းဆင်းကုသ စစ်ဆေးတာတွေ မရှိသေးဘူးလို့လည်း ဒေသခံတွေကဆိုကြပါတယ်။
အာရက္ခတပ်တော်ဟာ ဂွ နဲ့ သံတွဲမြို့တွေကို ပြီးခဲ့တဲ့ ၂၀၂၄ ခု စက်တင်ဘာလ နဲ့ ဒီဇင်ဘာလ ကတည်းကပင် အပြီးသတ်ရရှိထားပြီးဖြစ်တဲ့ မြို့နယ်တစ်ခုလည်း ဖြစ်ပါတယ်။
