CNA ၊ မြတ်သူ။
သံတွဲခရိုင်မှာ စစ်ဘေးရှောင်တွေ နဲ့ ဒေသအတွင်းကကျန်းမာရေး မကောင်းသူတွေ ဆေးဝါးကုသရေး အဆင်ပြေစေဖို့ အတွက် လူမှုအဖွဲ့အစည်းတွေ နဲ့ အငြိမ်းစားကျန်းမာရေးဝန်ထမ်းတွေက ပူးပေါင်းပြီးတော့ အခမဲ့ နယ်လှည့်ဆေးကုသမှုတွေကို လုပ်ဆောင်နိုင်ဖို့အတွက် ပူးပေါင်းပြင်ဆင်နေတယ်လို့ သိရပါတယ်။
ဒီအစီအစဉ်ကို ငပလီကမ်းခြေစုပေါင်းပရဟိတအဖွဲ့ နဲ့ အငြိမ်းစားကျန်းမာရေးဝန်ထမ်းတွေစုပေါင်းကာ လုပ်ဆောင်တာ ဖြစ်ပြီး အခုလာမယ့် ဖေဖော်ဝါရီလ တတိယ အပတ်လောက်မှာ စတင်ကာ အကောင်အထည်ဖော်သွားဖို့ လုပ်ဆောင်နေတယ်လို့ ငပလီကမ်းခြေစုပေါင်းပရဟိတအဖွဲ့ကတာဝန်ရှိသူ ကို သက်လွှင်ဖြိုးက CAN ကိုပြောပါတယ်။
“ဆေးမကုနိုင်တဲ့လူအများကြီး စစ်ရှောင်စခန်းတွေ မှာ ဆေးခန့်ဖွင့်တဲ့နေရာမလာနိုင်ကြတာရယ် ခရီးစရိတ်ရယ် ဆေးဖို့မရှိတာရယ် နယ်လှည့်ပြီးတော့ တစ်ပတ်တစ်ကြိမ် အခမဲ့ကုသိုလ်ပြုဆေးကုမှာဖြစ်တယ်။ စပြီးတော့ လုပ်မှာကတော့ အခုလာမယ့် ဖေဖော်ဝါရီ တတိယပတ်လောက်မှာ စတင်လုပ်ဆောင်သွားမှာ ဖြစ်တယ်”လို့ သူကပြောပါတယ်။
လက်ရှိမှာတော့ ဒီအစီအစဉ်ကို စတင်နိုင်ဖို့အတွက် လိုအပ်တဲ့ ဆေးဝါးဝယ်ယူတာတွေကို လုပ်ဆောင်နေပြီးဖြစ်သလို တစ်ပတ်အတွင်းမှာ ကုန်ကျစရိတ် သိန်း ၃၀ ကျော် အထိရှိနေတဲ့ အတွက် ရေရှည်ရပ်တည်နိုင်ရေးအတွက်ကိုလည်း ပြည်တွင်း ပြည်ပက အလှူရှင်တွေရဲ့ ကူညီပံ့ပိုးမှုတွေလည်း လိုအပ်နေတယ်လို့ သူက ဆိုပါတယ်။
ဒါ့အပြင် ဒီအဖွဲ့ဟာ ဒေသအတွင်းမှာ ရှိနေတဲ့ ပြည်သူတွေကို အခမဲ့ဆေးကုသနိုင်ဖို့ အတွက် ကိုထူကိုယ်ထစနစ် နဲ့ ကျန်းမာရေးပိုင်ဆိုင်ရာကိစ္စရပ်တွေကို လုပ်ဆောင်နိုင်ဖို့ အတွက် စတင်လုပ်ဆောင်နေတဲ့ အဖွဲ့အစည်းတစ်ခုလည်း ဖြစ်ပါတယ်။
သံတွဲ နဲ့ ဂွမြို့နယ်တွေက စစ်ဘေးရှောင်စခန်းတွေမှာ ပြီးခဲ့တဲ့ လပိုင်းကတည်းကပင် အရေပြားရောဂါ ဖြစ်ပွါးသူ ဦးရေတွေဟာ သိသိသာသာတိုးလာနေတာတွေ ရှိနေပြီး အခုလို ပြည်သူတွေ လိုအပ်ချိန်မှာ နယ်လှည့် ဆေးကုသရေး အဖွဲ့တွေ ပေါ်ပေါက်လာတာဟာ ဒေသအတွင်း ရောဂါ ဝေဒနာ ခံစားနေရသူတွေအတွက် အထူးဝမ်းသာစရာကောင်းတဲ့ အရာတစ်ခုဖြစ်တယ်လို့လည်း ဂွမြို့နယ်အတွင်းက စစ်ဘေးရှောင်အရေး ကူညီနေသူတစ်ဦးကလည်း ဆိုပါတယ်။
“အခုက ဆေးဝါးကုသပေးမှုအပိုင်းကအလွန်အရေးပါတဲ့အပိုင်းဖြစ်နေတယ် ။ ကိုယ်ဝန်ဆောင်တွေ ၊ ကလေးတွေ၊ သက်ကြီးရွယ်အိုတွေက စစ်ရှောင်စခန်းတွေမှာ နေကြရတာဆိုတော့ အရေပြားရောဂါအပါအဝင် တခြားကျန်းမာရေးပိုင်းဆိုင်ရာတွေအတွက် ဆေးကုသပေးဖို့ လိုအပ်နေတာတော့တကယ်။ ကျနော်တို့ဆိုရင် ဆေးဝါးတွေလည်း ကူညီပေးနေတယ် ဒါပေမယ့် ကျနော်တို့က ဆေးပညာရှင်တွေ မဟုတ်တော့ အနာ နဲ့ ဆေးမတည့်တဲ့အခါ မထိရောက်တာတွေ ရှိတယ် အခု ကျန်းမာရေး ကိစ္စကို နားလည်သူတွေ ပါလာတယ်ဆိုတော့ တော်တော် အဆင်ပြေတယ်လို့ မြင်မိတယ် ဝမ်းလည်းဝမ်းသာတယ်”လို့သူကပြောပါတယ်။
အာရက္ခတပ်တော်ဟာ ဂွ နဲ့ သံတွဲမြို့တွေကို ပြီးခဲ့တဲ့ ၂၀၂၄ ခု စက်တင်ဘာလ နဲ့ ဒီဇင်ဘာလ ကတည်းကပင် အပြီးသတ်ရရှိထားပြီးဖြစ်တဲ့ မြို့နယ်တစ်ခုဖြစ်ပေမယ့် စစ်ဘေးရှောင်ပြည်သူတွေဟာ ဒေသအတွင်း မိုင်းရှင်းလင်းရေးတွေ မလုပ်ဆောင်နိုင်သေးတာ၊စစ်ကောင်စီရဲ့လေကြောင်း အန္တရာယ်တွေ ရှိနေသေးတာကြောင့် နေရပ်ကို ပြန်ဝင်ခွင့် မရသေးတာလည်း ဖြစ်ပါတယ်။
