CNA ၊ လင်းလင်း။
ရခိုင်က အာရက္ခတပ်တော် ထိန်းချုပ်ထားတဲ့ နေရာတွေမှာ ဆေးရုံဆေးခန်းတွေဟာ ပြန်လည်ပတ်နေပြီးဖြစ်တယ်လို့ အာရက္ခပြည်သူ့ကျန်းမာရေး ဌာန နဲ့ နီးစပ်သူတွေက CNA ကိုပြောပါတယ်။
အာရက္ခတပ်တော်ဟာ ရခိုင်တကျော့ပြန်တိုက်ပွဲ ဖြစ်ပွါးပြီးနောက် တစ်နှစ်ကျော် ကာလအတွင်းမှာ ရခိုင်က မြို့နယ် ၁၄ မြို့အထိကို စစ်ကကောင်စီလက်ထဲကနေ အပြီးသတ်သိမ်းပိုက်ရရှိထားနိုင်ခဲ့ပြီး တိုက်ပွဲ အတွင်းက ပိတ်ထားခဲ့ရတဲ့ ဆေးရုံဆေးခန်းတွေကို လက်ရှိမှာ ပြန်လည် ဖွင့်လှစ်ကာ လည်ပတ်နေပြီး ဖြစ်တယ်လို့ အာရက္ခပြည်သူ့ကျန်းမာရေး ဌာန နဲ့ နီးစပ်သူတစ်ဦးက CNA ကိုပြောပါတယ်။
“ရခိုင်မြောက်ပိုင်းက နေရာတော်တော်များများမှာ ပြန်ပြီးတော့လည်ပတ်နေတာ ဟုတ်ပါတယ်။ဒါပေမယ့် နေရာတွေကိုတော့ စစ်ကောင်စီလေကြောင်းရန်တွေကြောင့် ပြောမရတဲ့ အနေ အထားမှာ ရှိပါတယ်။ဆေးဝါးတွေကတော့ တချို့ဟာတွေ မရှိတာတွေတော့ ရှိတယ်လို့ပြောတယ်။အရမ်းအရေးကြီးတဲ့ ကိစ္စတွေတော့ ကုသလို့မရပေမယ့် အသေးစားအလတ်စား ခွဲစိတ်မှု အနေအထားလောက်ကိုတော့ လုပ်လို့ရနေပြီလို့သိထားရတယ်”လို့ သူကပြောပါတယ်။
အဲဒီလို ဆေးရုံဆေးခန်းတွေကို အာရက္ခပြည်သူ့ကျန်းမာရေးဌာန က ဖွင့်လှစ်ကာ ဒေသခံပြည်သူတွေ ရဲ့ ကျန်းမာရေးစောင့်ရှောက်မှုတွေကို ပေးနေတာတွေ ရှိနေပေမယ့် စစ်ကောင်စီက ဆေးဝါး နဲ့ ကုန်စည်စီးတင်သွင်းမှုအပြင် လျှပ်စစ်မီးတွေကိုပါ ဖြတ်တောက် ပိတ်ဆို့ထားတဲ့ အတွက် တချို့ ရောဂါပိုင်းဆိုင်ရာတွေကိုတော့ ကုသလို့ မရနိုင်သေးတဲ့ အခြေအနေမှာ ရှိသေးတယ်လို့ ဆိုပါတယ်။
တစ်ဖက်မှာလည်း အာရက္ခတပ်တော်ရဲ့ ဆေးဝန်ထမ်းတွေဟာ အာရက္ခပြည်သူ့ကျန်းမာရေးဌာန နဲ့ ပူးပေါင်းကာ မောင်တော၊မြောက်ဦး၊ရသေ့တောင်၊ဘူးသီးတောင်၊အပြင် တခြားမြို့နယ်တွေ က နေရပ်ပြန်ခွင့်မရသေးတဲ့ စစ်ဘေးရှောင်တွေ နဲ့ ဒေသအတွင် ကျန်းမာရေး မကောင်းတဲ့ သူတွေကို နယ်လှည့်ဆေးကုသပေးတာတွေကိုလည်း ဆက်တိုက်လုပ်ဆောင်နေတာတွေလည်း ရှိနေတယ်လို့ အာရက္ခတပ်တော် ရဲ့ ဆေးဝန်ထမ်းတစ်ဦးကဆိုပါတယ်။
“ကျနော်တို့အခုက ဒီရခိုင်မှာ ဖြစ်နေတဲ့ ရေကျောက်ရောဂါလို့ ခေါ်တဲ့ (ယားနာတစ်မျိုး)ကို အာရက္ခပြည်သူ့ကျန်းမာရေးဌာန နဲ့ ပူးပေါင်းပြီးတော့ နယ်လှည့်ဆေးကုသပေးတာတွေ ရှိနေတယ်။ပြီးတော့ ဒီရောဂါကို နောက်ထပ်ကူးစက်ပြန့်ပွါးမှု မရှိအောင် ဘယ်လို နေထိုင်နေကြရမယ်ဆိုတဲ့ ဟောပြောမှုတွေကိုလည်း ဆက်တိုက်လုပ်နေတာတွေ ရှိနေတယ်”လို့ သူကဆိုပါတယ်။
ရခိုင်က လွတ်မြောက်နယ်မြေတွေမှာ အာရက္ခတပ်တော်ဟာ ပြည်သူတွေ ရဲ့ ပြန်လည်ထူထောင်ရေး၊ကျန်းမာရေး ၊ဒေသဖွံ့ဖြိုးတိုးတက်ရေး စတာတွေကို ဆက်တိုက်ဆိုသလို့ ရခိုင်ပြည်သူတွေ နဲ့ အတူ အားကြိုးမာန်တက် ဆက်တိုက်လုပ်ဆောင်လာတာရှိပေမယ့် စစ်ကောင်စီရဲ့ လေကြောင်းတိုက်ခိုက်မှုတွေကြောင့် ပြန်လည်ထူထောင်ရေးလုပ်ငန်းတွေ လုပ်ဆောင်တဲ့ နေရာတွေမှာ အခက်အခဲများစွာ နဲ့ ရင်ဆိုင်ကြုံတွေ့နေရဆဲဖြစ်တယ်လို့လည်း ဒေသခံတွေက ပြောဆိုကြပါတယ်။
