သံတွဲမှာ ပြန်လည်ထူထောင်ရေးဆိုတဲ့ခေါင်းစဉ် နဲ့ ပြည်သူတွေဆီက ငွေတောင်းခံတာတွေ ရှိနေ

သံတွဲမြို့ပြန်လည်ထူထောင်ရေးဆိုတဲ့ ခေါင်းစဉ် နဲ့ သံတွဲမြို့ကနေ စစ်ဘေးရှောင်ဖို့ထွက်ပြေးနေသူတွေဆီကို ဖုန်းနဲ့တဆင့် ဆက်သွယ်ပြီး ငွေကြေးတောင်းခံတာတွေကို အာရက္ခတပ်တော် အေအေ အမည်သုံးကာ ပြီးခဲ့တဲ့လပိုင်းကတည်းကပင် လုပ်ဆောင်ခဲ့တာတွေ အများအပြီးရှိခဲ့တယ်လို့ ဒေသခံတွေကပြောပါတယ်။

အဲဒီဖုန်းဆက်လာတဲ့ သူတွေဟာ သူတို့ကိုသူတို့ အာရက္ခတပ်တော် ရဲ့ နယ်မြေတာဝန်ခံ ဖြစ်တယ်ဆိုပြီး ဖုန်းဆက်ပြောလာတာဖြစ်ပြီး ကျန်နေခဲ့တဲ့နေအိမ်တွေ စောင့်ရှောက်ခနဲ့ နယ်မြေပြန်လည်ထူထောင်ရေးအတွက်ဆိုတဲ့ ခေါင်းစဉ် နဲ့ အခုလိုငွေတောင်းခံနေတာဖြစ် တယ်လို့ဆိုပါတယ်။

အဲဒီပြန်လည်ထူထောင်ရေး နဲ့ အိမ်စောင့်ရှောက်ခလို့ဆိုပြီး ငွေတောင်းခံရသူ အများစုဟာ ဒေသအတွင်းမှာ အဆင်ပြေပြေနေထိုင်နိုင်သူတွေဖြစ်ကြပြီး အိမ်တစ်အိမ်ကို ငွေကျပ် ၅ သိန်းကနေ သိန်း ၃၀ အထိ တောင်းခံနေတာဖြစ်တယ်လို့ ကိုယ်တိုင် ငွေကျပ် သိန်း ၃၀ ပေးခဲ့ရသူ တစ်ဦးကပြောပါတယ်။

“ကျမတို့ဆီကိုဖုန်းဆက်လာတယ်။ သူက အာရက္ခတပ်တော် ရဲ့နေမြေတာဝန်ခံ လို့ပြောတယ်။ကျမတို့အသိပါပဲ သူက ရွှေကျောင်းပြင်ရွာက အခုမှ သူကနယ်မြေတာဝန်ခံ အိမ်တွေ စောင့်ရှောက်ခ နဲ့ မြို့ပြန်လည်ထူးထောင် ရေးအတွက်ဆိုပြီးတောင်းလာခဲ့တယ်။ ကျမတို့ သိန်း ၃၀ ပေးလိုက်ရတယ်။မပေးရင် အိမ်ကိုမီးရှို့ပစ်မယ်လို့ ခြိမ်းခြောက်ပြော ဆိုတာကြောင့်လို့” သူကပြောပါတယ်။

လက်ရှိမှာ အာရက္ခတပ်တော် အေအေ ရဲ့ တပ်ဖွဲဝင် နဲ့ အုပ်ချုပ်ရေးဘက်က အကျင့်ပျက်ဝန်ထမ်းတချို့ဟာ လုပ်ပိုင်ခွင့်၊ အာဏာတွေကို အလွဲသုံးစားလုပ်ပြီးတော့ ပြည်သူ့စည်းစိမ်ဥစ္စာတွေကို ယူသုံးတာတွေ ရှိနေတာကြောင့် အဲဒီဝန်ထမ်းတွေကို ထိရောက်စွာ အရေး ယူဆောင် ရွက်သွားမယ်လို့ ပြီးခဲ့တဲ့စက်တင်ဘာလ ၁၃ ရက်နေ့မှာ အေအေ ကတရားဝင်ထုတ်ပြန်ထားခဲ့ပါတယ်။

ဒီထုတ်ပြန်ချက် နဲ့ပတ်သက်ပြီး သံတွဲမြို့ဒေသခံ တစ်ဦးပြောတာက“တပ်တော် ထုတ်ပြန်ချက်ထဲမှာ နေမြေတာဝန်ခံတွေ အုပ်ချုပ် ရေးမှူးတွေကို ပစ္စည်းပျောက်တာရှိရင်တိုင်ကြားလို့ ရတယ်လို့ပြောတယ် ။အခုက ဒေသခံ နယ်မြေတာဝန်ခံဆိုတဲ့ သူတချို့က လုပ်ချင်သ လို လုပ်နေတာ တိုင်ရင်းလည်း ဘာမှမထူးဘူးလို့မြင်တယ်။ပြောရင်လည်း ဘာမှဂရုမစိုက်ဘူး။သူခိုးတွေ နဲ့ ပေါင်းလုပ်စားတယ် ။တပ်တော်အတွက် လိုအပ်တယ်ဆိုရင် အကုန်ပေး လိုက်ရပါစေ ဘာမှ အရေးမကြီးဘူး။အခုက တစ်ဦးတစ်ယောက်ကောင်းစားရေး အတွက်လုပ်နေတာ။မခိုးရ၊မဝှက်ရ၊မလုရ၊ သူတပါးအိမ်ကို ဖောက်ထွင်းခြင်းမပြုရဆိုပြီး တင်းတင်းကြပ်ကြပ်လုပ်သင့်တယ်”လို့သူကပြော ပါတယ်။

လက်ရှိသံတွဲမြို့နယ် အတွင်းမှာရှိနေတဲ့ နေအိမ်တွေထဲက ၉၀ ရာခိုင်နူန်းလောက်ဟာ အာရက္ခတပ်တော် အေအေ သိမ်းပိုက်ပြီးနောက်ပိုင်းမှာ ပိုမိုဖောက်ထွင်းခံရပြီး မြို့တွင်းမှာ ရှိနေတဲ့ အိမ်တွင်း ပစ္စည်းအပါအဝင် ဆိုင်ကယ်၊ကား စတဲ့ အရာတွေဟာ ဘာမှမကျန်ရှိတော့တဲ့ အနေအထားမှာ ရှိနေတယ်လို့ ဒေသခံတွေကပြောပါတယ်။

ဒါ့အပြင် မြို့ရွာပြန်လည်ထူထောင်ရေးဆိုတဲ့ ငွေကြေးတောင်းခံမှုတွေကလည်း ဒီနောက်ပိုင်းမှာပိုမိုများပြားလာနေတာတွေကိုလည်းမြင်တွေ့ နေရတယ်လို့နောက်ထပ် ဒေသခံ တွေကဆိုပါတယ်။

အာရက္ခတပ်တော် အေအေ ကတော့ ဒေသခံပြည်သူတွေ အနေ နဲ့ စစ်ဘေးရှောင်ထွက်သွားချိန်က သယ်ယူသွားလို့ မရပဲ ကျန်နေခဲ့တဲ့အဖိုးတန်ပစ္စည်းများ၊ ရွှေ၊ ငွေ၊ လက်ဝတ်ရတနာတွေအပါအဝင် အိမ်တွင်သိမ်းဆည်းထား၊ ဝှက်ထားခဲ့တဲ့ ပစ္စည်းတွေ မပျက်စီးပဲ ပျောက်ဆုံးတာတွေ ရှိခဲ့ရင် ပြည်သူတွေ အနေ နဲ့ တိုင်ကြားဖို့ တိုက်တွန်းထားတာလည်းရှိပါတယ်။

သံတွဲ မြို့နယ်ဟာ တိုက်ပွဲကာလမှာတောင် အာရက္ခတပ်တော် ULA/AA နာမည်ကိုသုံးပြီးတော့ သံတွဲ၊ ငပလီပတ်ဝန်းကျင်မှာ ရှိတဲ့ ဟိုတယ် နဲ့ခရီးသွား လာရေး လုပ်ငန်းရှင်တွေ ဆီက အတင်းအဓမ္မ ငွေလိမ်လည် တောင်းခံမှုတွေ ရှိ နေတဲ့ကြောင့် အဲဒီလိုလုပ်ဆောင် နေတဲ့ သူတွေကို ချက်ချင်းရပ်တန့်ဖို့ အတွက် ဇူလိုင်လ ၂ ရက်နေ့မှာ အေအေက သတိပေးစာ ထုတ်ပြန်ကာ တားမြစ်တဲ့ အခြေအနေထိ လုပ်ဆောင် ခဲ့ရပါတယ်။