CNA၊မြတ်သူ။
တောင်ကုတ်ကနေ စစ်ဘေးရှောင်ဖို့ ထွက်လာပြီး ဥသျှစ်ပင်စခန်းမှာ ဖမ်းဆီးစစ်ဆေးခံနေရတဲ့ ဒေသခံ ၄၀ ကျော်ကို ဒီနေ့မနက် ၁၀ နာရီမှာ ပြန်လည်လွတ်ပေးလိုက်တယ်လို့ သိရပါတယ်။
အဲဒီဒေသခံ ၄၀ ကျော်ဟာ တောလမ်းအတိုင်း တောင်ကုတ်မြို့တွင်းကနေပြီးတော့ စစ်ဘေးရှောင်ဖို့ အနယ်နယ်အရပ်ရပ်ကို ထွက်လာကြသူတွေဖြစ်ကြပြီး နိုဝင်ဘာလ ၂၃ ရက်နေ့မှာ ဖမ်းဆီးခံလိုက်ရတာဖြစ်ပါတယ်။
အဲဒီနောက် ဒီနေ့ မနက် ၁၀ နာရီလောက်မှာတော့ စစ်ဆေးမေးမြန်းစရာတွေကို မေးမြန်းပြီးတော့ ပြန်လည်လွတ်ပေးလိုက်တာဖြစ်တယ်လို့ ပြန်လည်လွတ်မြောက်လာတဲ့ စစ်ရှောင်တစ်ဦးကပြောပါတယ်။
“သူတို့ စစ်ဆေးမေးမြန်းတာတွေ မေးပြီးတော့ ပြန်လွတ်ပေးလိုက်တာပါ။အကုန်လုံးကတော့ အဆင်ပြေကြပါတယ်။အေးအေးဆေးဆေးဖြစ်သွားပါပြီလို့”သူကဆိုပါတယ်။
အာရက္ခတပ်တော်နဲ့ စစ်ကောင်စီတပ်တို့ဟာ ပြီးခဲ့တဲ့နိုဝင်ဘာလ ၁ ရက်နေ့ကတည်းက တောင်ကုတ်မြို့အတွင်းက ပန်းမြောက်တောင်မှာ စတင်တိုက်ပွဲ ဖြစ်ပွားခဲ့ကြတာဖြစ်ပြီး အာရက္ခတပ်တော်ဟာ တောင်ကုတ်မြို့နယ်အတွင်းကစစ် ကောင်စီအထိုင်တပ်စခန်းတွေ အပါအဝင် တောင်ကုတ်မြို့နယ် ရဲစခန်းကိုပါ အပြီးသတ်သိမ်းပိုက်နိုင်ခဲ့ပါတယ်။
အဲဒီကတည်းကပင် စစ်ကောင်စီဟာ စစ်ဘေးရှောင်နေထိုင်ရာနေရာတွေကို လေကြောင်းတိုက်ခိုက်မှုတွေ ဆက်တိုက်လုပ်နေတာကြောင့် ဒေသခံ တွေဟာ မြို့တွင်းမှာ နေထိုင်လို့ မရတော့ပဲ မြို့နဲ့ ဝေးရာနေရာတွေကို စစ်ဘေးရှောင်ထွက်လာကြရတာဖြစ်တယ်လို့ အဲဒီပြန်လွတ်လာသူတွေထဲက တောင်ကုတ်မြို့ခံတစ်ဦးက ထပ်မံပြောဆိုပါတယ်။
“မြို့က ရဲစခန်းကို တပ်တော်က သိမ်းလိုက်ကတည်းကပင် စစ်ကောင်စီက နေရာ အစုံကို ဗုံးကြဲတာပါ။ကျနော်တို့ စစ်ဘေးရှောင်တွေ မြို့ထဲက ထွက်ဖို့ခက်တာကြောင့် စာသင်ခကျောင်းတွေ ဘုန်းကြီးကျောင်းတွေမှာ စုပြီးတော့ စစ်ဘေးရှောင်နေတဲ့ နေရာဆိုပြီးတော့ နေခဲ့ကြတယ်။ဒါပေမယ့်စစ်ကောင်စီက လေကြောင်းတွေ ၊ဒရုန်းတွေ နဲ့ အဲဒီနေရာကို ဆက်တိုက်ဗုံးကြဲတယ် အဲတာကြောင့် နေမရတော့တဲ့ အဆုံး အကုန်လုံး ရိုးလမ်းအတိုင်း လမ်းလျှောက်ထွက်လာတာဖြစ်တယ်လို့”သူကပြောပါတယ်။
အဲဒီလို လေကြောင်းက ဗုံးကြဲတိုက်ခိုက်တာတွေကို စစ်ကောင်စီက ဆက်တိုက်လုပ်ဆောင်ခဲ့တာကြောင့် တောင်ကုတ်မြို့ သိမ်တောင် ဘောလုံးကွင်း နဲ့ ကျောင်းကြီးကြားဖက်အခြမ်းက နေအိမ်တွေနဲ့ ဆိုင်ခန်းတွေ မီးလောင် ပျက်စီးခဲ့ရသလို နိုဝင်ဘာလ ၂၃ ရက်နေ့ကလည်း အာရက္ခတပ်တော်က သိမ်းပိုက်ထားတဲ့ တောင်ကုတ်ရဲစခန်းကို လေကြောင်းက ဗုံးကြဲတိုက်ခိုက်ခဲ့တာကြောင့် ရဲစခန်းအတွင်းက အဆောက်အဦးများစွာ မီးလောင်ပျက်စီးခဲ့ရတယ်လို့ ဆိုပါတယ်။
ဒါ့အပြင် နိုဝင်ဘာလ ၁၉ ရက်နေ့ကလည်း တောင်ကုတ်မြို့နယ် အတွင်းက သိမ်တောင်ရပ်ကွက် နဲ့ ချောင်းတစ်ဖက်တစ်ကမ်းမှာ ရှိတဲ့ သင်္ချီကိုင်းကျေးရွာက လက်နက်ကြီး နဲ့ စစ်ကောင်စီက ရမ်းသမ်းပစ်ခတ်ခဲ့တာကြောင့် လက်နက်ကြီး ကျည်ကျရောက်ပြီးတော့ ဒေသခံ ၄ ဦး လက်နက်ကြီးကျည်ထိမှန်ကာ သေဆုံးခဲ့ရသလို နောက်ထပ် ၄ ဦးမှာလည်း အပြင်းအထန်ဒဏ်ရာ ရရှိခဲ့ရပါတယ်။
လက်ရှိမှာလည်း အာရက္ခတပ်တော်ဟာကျန်ရှိနေသေးတဲ့ စစ်ကောင်စီတပ်စခန်းတွေ ဖြစ်ကြတဲ့ စကခ – ၅ အပါအဝင် ခမရ – ၃၄၆၊ခမရ – ၅၄၄ တပ်ရင်းတွေကို ဆက်လက်ထိုးစစ်ဆင်တိုက်ခိုက်နေပြီး နှစ်ဖက်တိုက်ပွဲတွေ ဆက်လက်ပြင်းထန်နေဆဲဖြစ်ပြီး အဲဒီတပ်စခန်းတွေကို လက်မလွတ်ရေးအတွက် လေကြောင်းတိုက်ခိုက်တာကိုလည်း ဆက်တိုက်လုပ်ဆောင်နေတာလည်း ရှိနေတယ်လို့ ဆိုပါတယ်။
