တောင်ကုတ်က စစ်ဘေးရှောင်တချို့ စားနပ်ရိက္ခထောက်ပံ့မှုလိုအပ်နေ

CNA၊မြတ်သူ။

အာရက္ခတပ်တော် နဲ့ စစ်ကောင်စီတို့ ရဲ့ နှစ်ဖက်တိုက်ပွဲတွေကြောင့် တောင်ကု တ်မြို့နယ်အတွင်းက အိုးအိမ်စွန့်ခွါထွက်ပြေးနေကြရတဲ့ စစ်ဘေးရှောင် ပြည်သူ တချို့ဟာ စားဝတ်နေရေး အတွက် အထောက်အပံ့တွေလိုအပ်နေတယ်လို့ စစ်ဘေးရှောင်အရေး ကူညီသူတွေကပြောပါတယ်။

တောင်ကုတ်မြို့ပေါ်ရပ်ကွက်တွေက သောင်းနဲ့ချီတဲ့ ဒေသခံပြည်သူတွေဟာ စစ်ကောင်စီရဲ့ လေကြောင်းတိုက်ခိုက်မှုတွေကြောင့် အိုးအိမ်စွန့်ခွါကာ ဘေးလွတ်ရာနေရာတွေကို ထွက်ပြေးတိမ်းရှောင်နေကြရပါတယ်။

အဲဒီလို ထွက်ပြေးတိမ်းရှောင်သွားခဲ့ရတဲ့ နေရာမှာ မိသားစုစားဝတ်နေရေးအတွက် ဆန်ရိက္ခာပါမလာတာကြောင့် စားဝတ်နေရေး ခက်ခဲနေကြတဲ့ မိသားစုများစွာ ရှိနေတဲ့ အတွက် အဲဒီမိသားစုတွေကိုစားနပ်ရိက္ခာအရေးပေါ် ထောက်ပံ့ပေးမှုတွေ လိုအပ်နေတာဖြစ်တယ်လို့ တောင်ကုတ်မြို့က စစ်ဘေးရှောင်အရေး ကူညီပေးနေသူ ဦးချစ်ကျော်ကပြောပါတယ်။

“ကျနော်တို့ ဆီမှာတော့ စစ်ဘေးရှောင် ၂ ထောင်ကျော်ရှိနေပါတယ်။အဲဒီ နှစ်ထောင်ကျော်ထဲက ၅၀၀ ကျော်လောက်ဟာ ဘာမှပါမလာကြဘူး။ဒီအတိုင်း ထွက်ပြေးလာကြရတာ။ကျနော်တို့ အခုသူတို့ကို တပတ်စာ ဆန်တွေတော့ ဝေငှထားပါတယ်။ရေရှည်အတွက်ကတော့ အလှူငွေရဖို့ လိုပါတယ်။ကျနော် တို့ အလှူလည်း ခံနေပါတယ်လို့”သူကပြောပါတယ်။

တောင်ကုတ်မြို့နယ်အတွင်းက ဒေသခံပြည်သူအများစုဟာ မြို့တွင်းတိုက်ပွဲ မဖြစ်ခင်ကတည်းကပင် ဘေးလွတ်ရာ နေရာတွေကို ထွက်ပြေးကြဖို့ ပြင်ဆင် ခဲ့ကြပေမယ့် စစ်ကောင်စီက ထွက်ခွင့်မပေးခဲ့တာကြောင့် မြို့တွင်းတိုက်ပွဲ ဖြစ်ချိန်မှာ ပိတ်မိနေခဲ့ကြရပါတယ်။

အဲဒီနောက်မှာ မြို့တွင်းပိတ်မိနေသူတွေကို အာရက္ခတပ်တော်က ကယ်ထုတ်ကာ လွတ်မြောက်နေမြေတွေကို ပို့ဆောင်ပေးထား ပြီး နေထိုင်စားသောက်ရေး ကိစ္စတွေကိုလည်း ဆောင်ရွက်ပေးထားတာ ရှိပေမယ့် စစ်ဘေးရှောင်အများစုဟာ ဒီလအကုန်လောက်မှာ စားဝတ်နေရေးအတွက် ခက်ခဲမှုရှိလာနိုင်တဲ့ အနေအထားမှာ ရှိနေတယ်လို့ စစ်ဘေးရှောင်အရေးကူညီပေးနေတဲ့ ဆရာ တော် ဦးပုညကမိန့်တော်မူပါတယ်။

“အခုကတော့ တာဝန်ရှိသူတွေကလုပ်ပေးထားတာတွေရှိနေတဲ့ အတွက် အ ရမ်းခက်ခဲတဲ့ အခြေအနေမှာတော့မရှိသေးဘူးလို့ သိရတယ်။ဒါပေမယ့် ဒီလကုန်ရင်တော့ ခက်ခဲတဲ့ အနေအထားကို ရောက်လာနိုင်တယ်။စစ်ရှောင်တွေကလည်း အရမ်းများတော့ မလုံလောက်တဲ့ သဘောမှာရှိနေတယ်လို့”ဆရာတော်က မိန့်တော်မူပါတယ်။

အဲဒါကြောင့် ပြည်တွင်းပြည်ပကိုရောက်နေကြတဲ့ ဒေသခံ ပြည်သူတွေ အနေ နဲ့ စစ်ဘေးရှောင်တွေ မြို့သိမ်းတိုက်ပွဲပြီးချိန်ထိ စစ်ရှောင်စခန်းတွေမှာ ကောင်းမွန်စွာ နေထိုင်စားသောက်နိုင်ဖို့အတွက် အလှူငွေအထောက်အပံ့ပေးတာတွေ လုပ်ပေးဖို့လိုအပ်တယ်လို့လည်း စစ်ဘေးရှောင်အရေး ကူညီပေးနေသူတွေကတိုက်တွန်းပြောဆိုပါတယ်။

လက်ရှိမှာလည်း အာရက္ခတပ်တော်ဟာ တောင်ကုတ်မြို့ရဲ့ နေရာတော်တော်များများကို အပြီးသတ်သိမ်းပိုက်ရရှိထားပြီးဖြစ်ပေမယ့် သိမ်းပိုက်ဖို့ကျန်ရှိနေသေးတဲ့ စစ်ကောင်စီတပ်စခန်းတွေ ဖြစ်ကြတဲ့ စကခ – ၅ အပါအဝင် ခမရ – ၃၄၆၊ခမရ – ၅၄၄ တပ်ရင်းတွေကို ဆက်လက်ထိုးစစ်ဆင်တိုက်ခိုက်နေပြီး နှစ်ဖက်တိုက်ပွဲတွေ ဆက်လက်ပြင်းထန်နေဆဲဖြစ်ပြီး အဲဒီတပ်စခန်းတွေကို လက်မလွတ်ရေးအတွက် လေကြောင်းတိုက်ခိုက်တာကိုလည်း ဆက်တိုက်လုပ်ဆောင်နေတာလည်း ရှိနေတယ်လို့ သိရပါတယ်။