ဂွမှာ စစ်ရှောင်ဦးရေ ထပ်တိုးလာတဲ့ အတွက် အနွေးထည် နဲ့ စားနပ်ရိက္ခာတွေ အကူအညီတွေလိုအပ်နေ

CNA၊ဂူးဂူး။

ဂွမြို့ အနီးကို အာရက္ခတပ်တော် နဲ့ စစ်ကောင်စီတပ်တို့ရဲ့ နှစ်ဖက်တိုက်ပွဲ နီးကပ်လာတာ နဲ့ အတူ စစ်ရှောင်ဦးရေဟာလည်း ပိုတိုးလာတာကြောင့် စစ်ရှောင်တွေ အနေ နဲ့ အနွေးထည် နဲ့စားနပ်ရိက္ခာတွေ ကူညီထောက်ပံ့မှုတွေပေးဖို့ ပိုလိုအပ်နေတယ်လို့ စစ်ရှောင်အရေးကူညီဆောင်ရွက်ပေးနေတဲ့ လူမှုအဖွဲ့အစည်းတွေက ပြောပါတယ်။

“အခုက စစ်ရှောင် ၆၀၀၀ လောက်ဖြစ်သွားပြီ။စစ်ရှောင်တွေကတော့ ရာသီဥတုအေးတဲ့ဒဏ်။စားဝတ်နေရေး ခက်ခဲတဲ့ ဒဏ် တော်တော် ခံနေကြရတယ်။ကျနော်တို့မှာကလည်း အလှူငွေ ရရှိမှုနည်းတော့အကုန်လုံး အဆင်ပြေအောင်လည်း လုပ်မပေးနိုင်။ရှိတာလည်းကိုပဲ မျှပေးနေရတယ်လို့”စစ်ဘေးရှောင်အရေး ကူညီပေးနေသူ တစ်ဦးကပြောပါတယ်။

အာရက္ခတပ်တော် နဲ့ စစ်ကောင်စီရဲ့ တိုက်ပွဲတွေဟာ လက်ရှိမှာ ဂွမြို့နယ် နဲ့ ၅ မိုင်ခန့်အကွာ ရွာသစ်ကုန်းဆိုတဲ့ ကျေးရွာ အနီးမှာ နှစ်ဖက်တိုက်ပွဲတွေ ဆက်လက်ဖြစ်ပွါးနေတာရှိနေတယ်လို့ဆိုပါတယ်။

လက်ရှိစစ်ဘေးရှောင်အများအစုဟာ စစ်ကောင်စီရဲ့ လေကြောင်းရန်ကို စိုးရိမ်တာကြောင့် အရင်တုန်းကလို ဘုန်းကြီးကျောင်း စာသင်ကျောင်းတွေ မှာ မနေရဲတော့တဲ့ အတွက် တန်းတွေကြားက နေရာ အများစုမှာ တဲထိုးနေထိုင်နေကြရတဲ့ အတွက် ဆောင်းရာသီရဲ့ အအေးဒဏ်ကိုလည်း ခံစားနေရတာကြောင့် အနွေးထည် နဲ့ စောင်တွေလည်း များစွာ လိုအပ်မှုတွေ ရှိနေတယ်လို့ စစ်ဘေးရှောင်အရေး ကူညီပေးနေသူ တစ်ဦးက ပြောပါတယ်။

“အခုက စစ်ရှောင်တွေက အရင်လို ဘုန်းကြီးကျောင်းတွေမှာနေမရတော့ဘူးလေကြောင်းရန်ရှိတာကြောင့် အဲဒါကြောင့် ဘေးလွတ်မယ့်နေရာလို့ ထင်ရတဲ့ နေရာအများစုတွေမှာ သစ်ရွက်တည်းလေးတွေထိုးပြီးတော့ နေရတယ်။ အခုက အအေးဒဏ်ကလည်း တိုးလာတော့ ကလေးတွေ သက်ကြီးရွယ်အိုတွေ ကလေးငယ်ငယ်လေး မိခင်တွေက အဲဒီရာသီ ဥတုဒဏ်ကို ဆိုးဆိုးရွားရွားခံစားနေရတယ်။ပြီးတော့ နောက်တစ်ချက်က ချမ်းတယ်ဆိုပြီးတော့ မီးဖိုလို့ မရဘူး စစ်ကောင်စီက ကင်းထောက်ဒရုန်းတွေ နဲ့ ကြည့်ပြီးတော့ ဗုံးကြဲတာရှိတော့ စစ်ဘေးရှောင်တွေ တော်တော် ခက်ခက်ခဲခဲ ဖြစ်နေတယ်လို့”သူကပြောပါတယ်။

ဒါ့အပြင်လက်ရှိ ရာသီးအကူးအပြောင်းကြောင့် စစ်ရှောင်ပြည်သူအများစုဟာ ချောင်းဆိုး၊နှာစေး နဲ့ ဖျားနာမှုဒဏ်တွေကို ခံစားနေကြရပြီး အဲဒီအတွက် ဆေးဝါးလိုအပ်ချက်တွေလည်း များစွာရှိနေတယ်လို့ စစ်ဘေးရှောင်အရေး ကူညီပေးနေသူတွေကပြောပါတယ်။

စစ်ကောင်စီဟာ ဂွမြို့နယ် အတွင်းမှာ တိုက်ပွဲ မဖြစ်ပွါးခင်ကတည်းကပင် ဆေးဝါး နဲ့ စာနပ်ရိက္ခာသယ်ယူခွင့်တွေကို တင်းတင်းကြပ်ကြပ် ပိတ်ပင်ထားခဲ့တာကြောင့် စစ်ရှောင်တွေ အနေနဲ့ အခုလို အခြေအနေတွေကို ရင်ဆိုင်ကြုံတွေ့နေကြရတာလည်း ဖြစ်ပါတယ်။