CNA ၊ မြတ်သူ။
ရန်ကုန်မန္တလေးအပါအဝင်ပြည်မရောက်နေတဲ့ ရခိုင်စစ်ဘေးဒုက္ခတွေကိုဟာ အာရက္ခတပ်တော်AAနဲ့ ဆက်စပ်သူတွေဖြစ်တာကြောင့် စစ်ကောင်စီ အနေ နဲ့ ဖမ်းဆီး အရေးယူတာ တွေလုပ်ဖို့ ဒီရက်ပိုင်းအတွင်းမှာ စစ်လော်ဘီတွေက လူမှုကွန်ယှက်တွေပေါ်မှာ ရေးသားတာတွေ ဆက်တိုက်လုပ်လာနေတာတွေ ရှိနေတယ်လို့ ပြည်မကိုရောက်နေကြတဲ့ ရခိုင်ဒေသခံတဦးကပြောပါတယ်။
“စစ်လော်ဘီအကောင့်တွေက နေပြီးတော့ ပုံတွေနဲ့ တကွ ဒီလူတွေ ဒီလူတွေက အေအေ ရဲ့ထောက်ပို့တွေပါ ဆိုပြီးတော့ ဒီရက်ပိုင်းတွေမှာ ဆက်တိုက်ဝါဒဖြန့်လာတာတွေ ရှိနေတယ်။ရခိုင်တွေကိုပေါ့ အဓိကတော့ စစ်ဘေးရှောင်အရေးကို လုပ်ပေးနေတဲ့ သူတွေကို ပိုပြီးတော့ ပစ်မှတ်ထားတယ်ပေါ့။နောက်တစ်ခုက အေအေ ကို သူတို့ စစ်တပ်က စစ်ရှုံးလာတာ နဲ့ အမျှ ရခိုင်တွေကို ဖမ်းဆီးဖို့လှုပ်ဆော်တာတွေကိုလည်း လုပ်လာတာတွေ ရှိတယ်လို့” သူကပြောပါတယ်။
ရခိုင်တိုက်ပွဲတနှစ် ကျော်ကာလအတွင်း ရခိုင်ပြည်နယ်က မြို့နယ် ၁၄ခုနဲ့ ချင်းပြည်နယ်ကပလက်ဝမြို့နယ်တွေကို AAဘက်က အပြီးပိုင်သိမ်းပိုက်ထားနိုင်သလို စစ်ကောင်စီတပ်သားတွေနဲ့ ဗိုလ်ချုပ်အဆင့် အရာရှိတော်တော်များများကိုလည်း ဖမ်းဆီးထားနိုင်တာြဖစ်ပါတယ်။
အခုလို စစ်ကောင်စီတပ်တွေ ရခိုင်စစ်မြေပြင်မှာ စစ်ရေး အရှုံး နဲ့ ဆက်တိုက် ရင်ဆိုင်လာရချိန်မှာ ပဲစစ်လော်ဘီတွေက ပြည်မမှာရှိနေတဲ့ ရခိုင်စစ်ဘေးရှောင်ဖို့ ဖမ်းဆီးအရေးယူပေးဖို့ ရေးသားနေကြတာကြောင့် စိုးရိမ်နေကြရတယ်လို့လည်း ပြည်မကို စစ်ဘေးရှောင်ဖို့ ရောက်နေကြတဲ့ စစ်ဘေးရှောင်ပြည်သူတွေက ပြောပါတယ်။
“လုံခြုံမှုတော့ မရှိဘူးပေါ့ ကျနော်က တက္ကစီမောင်းတယ် အခု စစ်တပ်ဂိတ်တွေကိုဆိုရင် သိပ်ပြီးမဖြတ်ရဲတဲ့ အနေအထားမှာ ရှိတယ်။မှတ်ပုံတင်စစ်ရင် ၁၁/ကြီးဖြစ်နေတော့ လူတွေကလည်း ၁၁/ ဆိုရင် ဘာလုပ်တယ် ဘာဖြစ်တယ်ဆိုပြီးတော့ ပြောနေတော့ ကျနော်ဆို သိပ်တောင် တက္ကစီထွက်မဆွေးရဲတော့ဘူး ဒီနောက်ပိုင်း။စစ်တပ်အချင်းချင်းဖြစ်နေတာကို ပြည်သူတွေကို အခုလို လုပ်နေတာကတော့ အဆင်သိပ်မပြောဘူးလို့ပဲ မြင်မိတယ်လို့ “ သူကပြောပါတယ်။
ရခိုင်ပြည်နယ်မှာ တကြော့ပြန်တိုက်ပွဲတွေ စတင်ဖြစ်ပွားခဲ့တဲ့ ပြီးခဲ့တဲ့ ၂၀၂၃ခုနှစ် နိုင်ဝင်ဘာလ အကုန်ပိုင်းလောက်ကစပြီး ရခိုင်ပြည်နယ်က ဒေသခံတော်တော်များများဟာ အိုးအိမ်စွန့်ခွာပြီးတော့ ဘေးလွတ်မယ့်နေရာတွေကို ထွက်ပြေးနေကြရတာလည်းဖြစ်ပါတယ်။ အဲဒီက ပိုက်ဆံတတ်နိုင်တဲ့ သူတော်တော်များများကတော့ ပြည်မဘက်တွေကို ထွက်ပြေးတိမ်းရှောင်နေကြ တာလည်း ဖြစ်ပါတယ်။
