ယာယီနေရပ်စွန့်ခွာနေကြရတဲ့ စစ်ဘေးရှောင်ပြည်သူတွေကို အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲရေးရန်ပုံငွေကနေ လိုအပ်တဲ့ ထောက်ပံ့မှုတွေပေးမယ်လို့ စစ်ခေါင်းဆောင်မင်းအောင်လှိုင်က ပြောဆိုလာပါတယ်။
ဇန်နဝါရီ ၁၇ရက်နေ့တုန်းက ပြုလုပ်ခဲ့တဲ့ ပြည်ထောင်စုအစိုးရအဖွဲ့အစည်းအဝေးမှာ စစ်ခေါင်းဆောင် မင်းအောင်လှိုင်က အခုလိုပြောဆိုခဲ့တာပါ။
သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေပုဒ်မ ၂ ပုဒ်မခွဲ (ခ) အရ “သဘာဝဘေးအန္တရာယ်” ဆိုတဲ့ စကားရပ်ကို အဓိပ္ပာယ်ဖွင့်ဆိုရာမှာ “အကြမ်းဖက်ခြင်း၊ လက်နက်ကိုင်သောင်းကျန်းမှုဖြစ်ပွားခြင်း” တို့ဟာ သဘာဝဘေးအန္တရာယ်မှာပါဝင်တဲ့အတွက် စစ်ရှောင်ပြည်သူတွေကို လိုအပ်တဲ့ ထောက်ပံ့မှုတွေပေးဖို့ စီစဉ်နေတယ်လို့ မင်းအောင်လှိုင်က ဆိုပါတယ်။
ထောက်ပံ့မှူတွေပေးမယ့်အစီအစဉ်မှာ စစ်ရှောင်တွေအပြင် လုံခြုံရေးအန္တရာယ် စိုးရိမ်လို့ခေတ္တနေရပ်စွန့်ခွာလာရသူတွေလည်းပါဝင်တယ်လို့လည်း မင်းအောင်လှိုင်က ပြောပါတယ်။
လက်ရှိမှာတော့ ထောက်ပံ့မှုတွေပေးဖို့အတွက် တိုင်းဒေသကြီးနဲ့ ပြည်နယ်အလိုက်စာရင်းတွေကောက်ယူနေပြီး ဘုန်းကြီးကျောင်းကဲ့သို့သော ယာယီခိုလှုံရာစခန်း၊ ဆွေမျိုးသားချင်းတွေရှိရာ ရပ်ကွက်ကျေးရွာ၊ ဝန်ထမ်းအိမ်ရာ၊ မိမိအစီအစဉ်နဲ့ နေအိမ်ခန်းတွေ ငှားရမ်းနေထိုင်တာအပြင် အခြားနည်းနဲ့ နေထိုင်နေတဲ့ စစ်ရှောင်တွေလည်း စာရင်းကောက်ယူရာမှာ အကျုံးဝင်တယ်လို့ ဆိုပါတယ်။
သက်ဆိုင်ရာဌာနအဖွဲ့အစည်းတွေက စာရင်းကောက်ယူရာမှာလည်း အကျုံးဝင်သူအားလုံးက ပူးပေါင်းပါဝင်ဆောင်ရွက်ပေးဖို့ သက်ဆိုင်ရာကတစ်ဆင့် နှိုးဆော်ထားတယ်လို့လည်း စစ်ခေါင်းဆောင်က ပြောပါတယ်။
ဇန်နဝါရီ လလယ်လောက်ကစပြီး ရန်ကုန်မြို့မှာဆိုရင် ရခိုင်လူမျိုးတွေရှိရာနေရာတွေကို စစ်ကောင်စီက နာမည်စာရင်း၊ နေရပ်လိပ်စာတွေ အတိအကျစာရင်းကောက်ယူနေပြီး၊ ထောက်ပံ့မှုတွေပေးဖို့စာရင်းကောက်ယူတာလို့ ပြောတဲ့အကြောင်း ရန်ကုန်မြို့ကိုရောက်နေတဲ့ ရခိုင်စစ်ရှောင်တွေဆီက သိရပါတယ်။
ဒီလို စာရင်းကောက်တဲ့အပေါ် စိုးရိမ်ကြောင်းနဲ့ စစ်ကောင်စီအနေနဲ့ ထောက်ပံ့မှုတွေပေးစရာမလိုဘဲ ဖမ်းဆီးတာမျိုးတွေ မလုပ်ရင်ရပြီလို့ ရခိုင်စစ်ရှောင်တစ်ဦးက တောင်းဆိုထားပါတယ်။
“ဘာထောက်ပံ့မှုမှ ပေးစရာမလိုပါဘူး ကျနော်တို့ ဖမ်းတာဆီးတာမလုပ်ရင်ရတယ်။အခုဟာက သူတို့စာရင်းကောက်တာ ဖမ်းဖို့အတွက်ကောက်နေတယ်ဆိုတာ လူတိုင်းလည်းသိနေတယ်။ ရှေ့မှာ ဖမ်းထားတဲ့ လူတွေလည်းမနည်းဘူး။အခုသူတို့က ထောက်ပံ့ပေးမယ်လို့ပြောတာ တစ်ဖက်လက် နဲ့ လှည့်စားနေတာပြည်သူတွေ အခက်အခဲရောက်နေမှန်းသိလို့ အခုလား ငါးစာနဲ့ ထောင်ဖမ်းဖို့နည်း လုပ်တာဖြစ်တယ်လို့” ဆိုပါတယ်။
စစ်ကောင်စီဟာ ရန်ကုန်မြို့နယ်အတွင်းမှာ ရှိနေတဲ့ရခိုင်ပြည်သူတွေကို ဇန်နဝါရီလ အစပိုင်းကတည်းကပင် လိုက်လံစာရင်းကောက်ခံနေတာတွေ ရှိနေသလို စစ်ကောင်စီဟာ ပြီးခဲ့တဲ့ ရက်ပိုင်းတွေကလည်း ရန်ကုန်တိုင်းအတွင်းက မရမ်းကုန်း၊ ကျောက်မြောင်း၊ သာကေတ၊ ရွှေပြည်သာ၊ လှိုင်သာယာ၊ တောင်ဒဂုံ၊ မြောက်ဒဂုံ၊ မြောက်ဥက္ကလာ၊လှိုင်၊ယုဇနဥယာဉ်မြို့တော်တွေက ရခိုင် လူငယ် ၅၀ ထက်မနည်းကို ဖမ်းဆီးတာတွေရှိခဲ့တယ်လို့လည်းဆိုပါတယ်။
တစ်ဖက်မှာလည်း စစ်လော်ဘီတွေဟာ ရခိုင်စစ်မြေပြင်မှာ စစ်ရေး အရှုံးနဲ့ ဆက်တိုက်ရင်ဆိုင်လာရတာနဲ့ အတူ ရန်ကုန်ကို ရောက်နေတဲ့ ရခိုင်ပြည်သူတွေ နဲ့ ဗမာလူမျိုးတွေကို လူမျိုးရေးပြသနာဖြစ်အောင် ဝါဒဖြန့်တာတွေ ရှိနေသလို ရခိုင်တွေ နေထိုင်တဲ့ နေရာတွေကို စစ်ကောင်စီသတင်းပေး ဒလန်တွေက လိုက်လံ ရှာဖွေကာ သတင်းပေးတာတွေလည်း ရှိနေတယ်လို့ ဆိုကြပါတယ်။
