CNA ၊ မြတ်သူ။
ရခိုင်က ပုဏ္ဏားကျွန်း နဲ့ ရသေ့တောင်မြို့တွေက စစ်ဘေးရှောင်စခန်းတွေ နဲ့ ကျေးရွာတွေမှာ ရေရှားပါးမှု ပြသနာတွေ နဲ့ စတင်ရင်ဆိုင်ကြုံတွေ့ လာနေရပြီးဖြစ်တယ်လို့ ဒေသတွင်းလူမှုကူညီရေး အဖွဲ့တွေက ပြောပါတယ်။
ရခိုင်က မြို့ နယ်အများစုဟာ အရင်ကတည်းကပင် နွေရာသီရောက်တိုင်းမှာ ရေရှားပါးမှုဒဏ်ကို နှစ်စဉ်ရင်ဆိုင်နေကြရတာဖြစ်ပါတယ်။
ဒါပေမယ့် ဒီနှစ်မှာတော့ စစ်ရှောင်ဦးရေတွေ ပိုများတာကြောင့် ရေရှားပါးမှုဒဏ်ကို အရင်တုန်းက နှစ်တွေထက် ဦးစွာခံစားလာနေကြရတာ ဖြစ်ပြီး လက်ရှိ ပုဏ္ဏားကျွန်း မြို့နယ်အတွင်းမှာ ရေရှားပါးမှု ပြသနာကို ကြုံတွေ့နေရတဲ့ ကျေးရွာ ၄၀ ကျော်လောက်အထိ ရှိနေပြီးဖြစ်တယ်လို့ ပုဏ္ဏားကျွန်းမြို့နယ်အတွင်းက လူမှုကူညီရေးလုပ်ငန်းတွေကို လုပ်ဆောင်နေတဲ့ လင်းရောင်ခြည်ဖောင်ဒေးရှင်း တာဝန်ရှိသူ တစ်ဦးက ပြောပါတယ်။
“ဒီဇင်ဘာလောက်ကပင် စပြီးတော့ ရေရှားပါးမှုတွေ ရှိလာတာပေါ့ အခုကတော့ ပုဏ္ဏားကျွန်းက ကျေးရွာ ၄၀ ကျော်လောက်ဟာရေရှားပါးမှုဒဏ်ကို ခံစားနေရပါတယ်။အရင်နှစ်တွေကကလည်း ရေရှားပါးမှုတွေကို ရင်ဆိုင်ကြရတာပါ။ ဒါပေမယ့် ဒီနှစ်မှာက စစ်ဘေးရှောင်ပြည်သူတွေကလည်း စစ်တွေလိုနေရာတွေကပါ စစ်ရှောင်တာတွေ များလာတော့ အရင်နှစ်တွေကထက် ရေရှားပါးမှုဒဏ်ကို ခံစားနေရကြတာဖြစ်တယ်”လို့ သူကပြောပါတယ်။
လက်ရှိ ကျန်ရှိနေသေးတဲ့ ကန်တွေထဲက ရေတွေကို သောက်သုံးရေအတွက်အသုံးပြုနေတာတွေ ရှိနေပြီး ချိုးရေအတွက်ကိုတော့ ချောင်းရေကို အသုံးပြုနေကြရပြီးဖြစ်တယ်လို့လည်းဆိုပါတယ်။
တစ်ဖက်မှာလည်း ရခိုင်ပြည်အတွင်းမှာ ရှိနေကြတဲ့ စစ်ဘေးရှောင်ပြည်သူတွေဟာ အရေပြားရောဂါဒဏ်ကို ခံစားနေရဆဲ ဖြစ်တဲ့အတွက် မသန့်ရှင်းတဲ့ ချောင်းရေတွေကို ချိုးရေအဖြစ်အသုံးပြုရတာကြောင့် နောက်ထပ် အရေပြားရောဂါဖြစ်ပွါးတာတွေ ပြန်ရှိလာမှာကိုလည်း စိုးရိမ်နေရတယ်လို့ လည်း လူမှုကူညီရေး အဖွဲ့တွေက ဆိုကြပါတယ်။
အဲဒီလိုပဲ ရသေ့တောင်မြို့နယ်အတွင်းမှာရှိတဲ့ ကာမေဒုက္ခသည်စခန်းအပါအဝင် နေရာတော်တော်များများမှာ ရေရှားပါးမှု ဒဏ်ကို ခံစားနေကြရပြီး သောက်ရေ ရရှိရေးအတွက်ကို တော်တော် ခက်ခဲနေပြီး ဖြစ်တယ်လို့ ရသေ့တောင်မြို့နယ်အတွင်းမှာ ရှိနေတဲ့ ဒေသခံ တစ်ဦးက ပြောပါတယ်။
“အဓိကတော့ စစ်ဘေးရှောင်စခန်းတွေမှာတော့ ရေရှားပါးမှုက တော်တော်ရင်ဆိုင်နေရပြီ သောက်ရေရရှိနိုင်ဖို့အတွက်တောင် တော်တော် ခက်ခက်ခဲခဲဖြစ်နေပြီပေါ့ တချို့အလှူရှင်တွေကတော့ လာလှူတာတွေ ရှိတယ် နောက်ပိုင်းဒီထက်ပိုပြီးတော့ ရေရှားပါးမှုကို ပိုခံလာရမှာဖြစ်တယ်”လို့ သူကဆိုပါတယ်။
ရခိုင်ပြည်ဟာ မြန်မာနိုင်ငံအတွင်းမှာ မိုးအများဆုံးဒေသ တစ်ခုဖြစ်ပမေယ့် အရင်မြန်မာအစိုးရ အဆက်ဆက်ကတည်းကပင် ရခိုင်ပြည်သူတွေ အတွက် သောက်သုံးရေ ရရှိရေး အတွက် ရေတွင်း၊ရေကန် နဲ့ ဆည်တွေ လုံးလောက်စွာ မတူးဖော်ပေးခဲ့တာကြောင့် ရခိုင်ဒေသခံပြည်သူတွေဟာ နှစ်စဉ်နှစ်တိုင်း ရေရှားပါးမှု ပြသနာကို ကြုံတွေ ခံစားခဲ့ကြရတာလည်း ဖြစ်ပါတယ်။
လက်ရှိမှာ အဲဒီရေရှားပါးမှုဒဏ်ကို ရင်ဆိုင်နေရတဲ့ ရသေ့တောင် နဲ့ ပုဏ္ဏားကျွန်းမြို့တွေဟာ အာရက္ခတပ်တော်က စစ်ကောင်စီလက်ထဲကနေ အပြီးသတ်သိမ်းပိုက် ရရှိထားပြီး ဖြစ်တဲ့ မြို့နယ်တွေ ဖြစ်တဲ့ အတွက် လာမည့် နှစ်တွေ မှာ အခုလို ရေရှားပါးမှုဒဏ်ကို ရင်မဆိုင်ရအောင် အာရက္ခပြည်သူ့တော်လှန်ရေး အစိုးရ အနေ နဲ့ဆောင်ရွက်ပေးဖို့ လိုအပ်တယ်လို့လည်း ဒေသခံတွေက ပြောဆိုကြပါတယ်။
