ကျောက်ဖြူက စစ်ဘေးရှောင် ပြည်သူတွေအတွက် ကျန်းမာရေး နဲ့ စားသောက်ရေးတွေ အတွက် အကူအညီ လိုအပ်နေ

CNA ၊လင်းလင်း။

ကျောက်ဖြူမြို့နယ်အတွင်းက အာရက္ခတပ်တော် နဲ့ စစ်ကောင်စီတပ်တွေ ရဲ့ နှစ်ဖက်တိုက်ပွဲတွေ ကြောင့် ဘေးလွတ်ရာနေရာတွေကို ထွက်ပြေးနေကြရတဲ့ ဒေသခံပြည်သူ ၈၀၀၀ ကျော်လောက်ဟာ ကျန်းမာရေးစောင့် ရှောက်ပေး မှုတွေ နဲ့ အရေးပေါ် စားသောက်ရေးထောက်ပံ့တာတွေ လိုအပ်နေတယ်လို့ ကျောက်ဖြူမြို့နယ်အတွင်းက စစ်ဘေးရှောင်အရေး ကူညီပေးနေသူတွေက ပြောပါတယ်။

စစ်ကောင်စီတပ်တွေ နဲ့ အာရက္ခတပ်တော် တို့ဟာ ပြီးခဲ့တဲ့ ဖေဖော်ဝါရီလ ၂၀ ရက်နေ့ ကတည်းကပင် ကျောက်ဖြူမြို့နယ်အတွင်းမှာ နှစ်ဖက်တိုက်ပွဲတွေ ဆက်တိုက်ဖြစ်ပွါးခဲ့ပြီးနောက် စစ်ကောင်စီက လေကြောင်း တိုက်ခိုက်တာ လက်နက်ကြီးတွေ နဲ့ ပစ်ခတ်တာတွေ ကြောင့် ကျောက်ဖြူမြို့နယ် အတွင်းမှာ ရှိနေတဲ့ ကျေးရွာ ၁၀ ရွာက ဒေသခံ ပြည်သူ ၈၀၀၀ ကျော်လောက်ဟာ စစ်ပွဲ နဲ့ ဘေးလွတ်ရာနေရာတွေကို အဝတ်တထည် ကိုယ်တစ်ခု တည်းနဲ့ ထွက်ပြေးလာကြရတာ ဖြစ်ပါတယ်။

အဲဒီလို ထွက်ပြေးလာရတဲ့ ကျေးရွာတွေကတော့ ဦးကင်း၊စည်မော်၊ ကြတ္တိန်၊ ရှောက်ချောင်း၊စိုင်ခြုံ၊စစ်တောရွာ နဲ့ သစ်ပုတ်တောင် အပါအဝင် ကျေးရွာ ၁၀ ရွာက ဒေသခံတွေ ဖြစ်ကြပြီး လက်ရှိမှာ အဲဒီစစ်ဘေးရှောင် ပြည် သူတွေဟာ အဆင်ပြေသလို တိုက်ပွဲ နဲ့ ဘေးလွတ်ရာနေရာက ကျေးရွာတွေမှာ ရှိတဲ့ စာသင်ကျောင်း၊ ဘုန်း တော်ကြီးကျောင်း တွေ နဲ့ အိမ်ခြံတွေမှာ တဲထိုးနေထိုင်နေတာတွေ ရှိနေတယ်လို့ ဆိုပါတယ်။

အဲဒီလို စစ်ရှောင်ထွက်လာတဲ့ သူတွေထဲမှာ ကိုယ်ဝန်ဆောင်မိခင်တွေ၊ကလေးငယ်တွေ၊ကျန်းမာရေး မကောင်းသူ တွေ ၊မသန်စွမ်းသူတွေ နဲ့ သက်ကြီးပိုင်းတွေပါ ပါဝင်နေတဲ့ အတွက် စားသောက်ရေး အပြင် ကျန်းမာရေး စောင်ရှောက်မှုတွေလည်း ပေးဖို့ လိုအပ်နေတာ ဖြစ်တယ်လို့ဆိုပါတယ်။

“အခုနေထိုင်ရေး အတွက်ကတော့ အဆင်ပြေသလို နေကြရတာပေါ့ ဘုန်းကြီးကျောင်းတွေ ၊စာသင်ကျောင်းတွေ ပြီးတော့ ခြံတွေထဲမှာ တဲထိုးနေတာတွေ ရှိတာပေါ့။အဓိက လောလောဆယ်မှာတော့ စားသောက်ရေး အတွက်ကတော့ အဆင်ပြေပေမယ့် စစ်ရှောင်တွေထဲမှာ လသားကလေးတွေ၊သက်ကြီးပိုင်းတွေ၊ကိုယ်ဝန်ဆောင်မိခင်တွေ ပါနေတော့ ကျန်းမာရေးစောင့်ရှောက်မှုတွေကတော့ လိုနေသေးတာပေါ့”လို့ ကျောက်ဖြူမြို့နယ်အတွင်းက စစ်ဘေးရှောင်အရေး ကူညီပေးနေသူ တစ်ဦးပြောပါတယ်။

လက်ရှိမှာတော့ စားသောက်ရေး အတွက်ကို ကျေးရွာအတွင်းမှာ ရှိနေတဲ့ ပြည်သူတွေကတဆင့် ပြန်လည်မျှ ဝေပေးနေတာတွေရှိနေသလို ကူညီရေး အဖွဲ့ အစည်းတချို့ကလည်း လုပ်ဆောင်ပေးနေတာတွေ ရှိနေတယ်လို့ ဆိုပါတယ်။

အခုလို ဒေသအတွင်းက ရှိတဲ့ သူတွေက ပြန်လည်မျှဝေပေးတာ နဲ့ လူမှု အဖွဲ့အစည်းတချို့ကရံဖန်ရံခါ လာရောက် လှူဒါန်းပေးမှုတွေဟာ စစ်ဘေးရှောင် ပြည်သူတွေ အတွက် ရေရှည်ရပ်တည်ရေးမှာ အဆင်မပြေတဲ့ အတွင် ဒီစစ်ဘေးရှောင်ပြည်သူတွေ စားသောက်ရေးအတွက် အဆင်ပြေအောင် ဒေသအတွင်းမှာ ရှိနေတဲ့ လူမှုကူညီရေး အဖွဲ့တွေ အနေ နဲ့ ပူးပေါင်းကာကူညီပေးတာတွေကို လုပ်ဆောင်တာတွေ ပေးဖို့ လိုအပ်နေတယ်လို့လည်း ဆိုကြပါတယ်။

“ကျနော့်သဘောအရ ပြောရရင်တော့ အခုကတော့ ဒေသကဝေမျှတာ တချို့ ပရဟိတအဖွဲ့တွေ ကလာလှူတာတွေ ရှိတယ်။ဒီဟာက စစ်ပွဲတစ်ပွဲစာအတွက် စစ်ရှောင်တွေ ရပ်တည်နိုင်မယ့် အနေအထားတော့မဟုတ်ဘူး။ဘယ်လောက်ကြာမယ်ဆိုတာကိုလည်းမသိ ပြီးတော့ ပြေးလာတဲ့ သူတွေကလည်း ဘာမှလည်း ပါတဲ့ သူတွေမရှိကြဘူး ခြုံစောင်တောင်ပါလာတာမဟုတ်ဘူး အသက်လုထွက်ပြေးလာရတာ ဒီဟာကိုကျနော်တို့ အနေ နဲ့ စစ်ရှောင်တွေ ရေရှည်ရပ်တည်နိုင်အောင် ဒေသက အဖွဲ့အစည်းတွေ ပူးပေါင်းပြီးတော့ အလှူခံပြီးတော့ ရေရှည်ရပ်တည်ရေး အတွက်လုပ်သင့်တယ်လို့မြင်တယ်”လို့ အဲဒီ စစ်ရှောင်တွေကို ကူညီပေးနေသူက ဆိုပါတယ်။

ဒါ့အပြင် တဖက်မှာလည်း စစ်ကောင်စီ နဲ့ အာရက္ခတပ်တော် တို့ နှစ်ဖက်တိုက်ပွဲတွေ ဖြစ်နေတဲ့ ဦးကင်း၊စည်မော်၊ ကြတ္တိန်၊ ရှောက်ချောင်း၊စိုင်ခြုံ၊စစ်တောရွာ နဲ့ သစ်ပုတ်တောင်ကျေးရွာတွေက ပြည်သူတွေကို စစ်ရှောင် ထွက်ခွင့်မရ အောင် စစ်ကောင်စီက ပိတ်ဆို့ထားတာကြောင့် ကျေးရွာတွေ အတွင်းမှာ ပိတ်မိနေရတဲ့ ဖြစ်တယ်လို့ ဆိုပါတယ်။

လက်ရှိကျောက်ဖြူတိုက်ပွဲ အခြေအနေတွေ နဲ့ ပတ်သပ်ပြီးတော့ အာရက္ခတပ်တော် အနေ နဲ့တော့ တစ်စုံတရာ ဒီနေ့ အချိန်ထိ ထုတ်ပြန်ပြောဆိုတာတွေ မရှိသေးသလို CNA အနေ နဲ့ အာရက္ခတပ်တော် ပြောခွင့်ရ ဦးခိုင်သုခကို ဆက်သွယ်မေးမြန်းထားပေမယ့် ပြန်လည် ဖြေကြားပေးတာတွေတော့ မရှိသေးပါဘူး။

ရခိုင်မှာတကျော့ပြန်တိုက်ပွဲစတင်ပြီးနောက်ပိုင်းမှာ ရခိုင်က ပြည်သူ ၆ သိန်းကျော်လောက်ဟာ စစ်ရှောင်ဘဝ တွေ နဲ့ နေထိုင်နေကြရပြီး သူတို့ အတွက် ဆေးဝါးများ၊ စားနပ်ရိက္ခာများ နဲ့ တခြားကိစ္စ နဲ့ ပြန်လည်ထူထောင်ရေး လုပ်ငန်းတွေအတွက် အကူအညီတွေ လိုအပ်နေတယ်လို့ အာရက္ခတပ်တော် ရဲ့ လူသားချင်း စာနာထောက်ပံ့ရေးရုံး HDCOက ၂၀၂၄ ခုနှစ် ဒီဇင်ဘာလ မှာ သတင်းထုတ်ပြန် ပြောဆိုထားပါတယ်။