ပြီးခဲ့တဲ့ ရက်ပိုင်းအတွင်းက မိုးအဆမတန်ရွာသွန်းတာကြောင့် စိုးရိမ်ရေမှတ် အခြေအနေမှာ ရှိနေတဲ့ သံတွဲ မြို့နယ် သူဌေးချောင်းရေအားလျှပ်စစ်စီမံကိန်း အနီးမှာ ရှိတဲ့ ကျေးရွာဒေသခံ ပြည်သူတွေကို အာရက္ခတပ်တော် အေအေ က ဇူလိုင်လ (၂၇) ရက်နေ့ ညနေကတည်းကပင် ဘေးလွတ်ရာနေရာတွေကို ပြောင်းရွေ့ပေး ထားပြီး ဖြစ်တယ်လို့ အေအေ ရဲ့ သတင်းအရင်းအမြစ်တွေကပြောပါတယ်။
အေအေ ရဲ့ ဇူလိုင်လ (၂၇) ရက်နေ့ သတင်းထုတ်ပြန်ချက်အရ သူဌေးချောင်းရေအားလျှပ်စစ်စီမံကိန်းဆည် ရဲ့ ရေ စိုးရိမ်ရေမှတ် (အနီရောင်အဆင့်) ကို ကျော်လွန်လာနေတာကြောင့် ဆည် နဲ့ အနီးပတ်ဝန်းကျင် ကကျေးရွာ တွေ နဲ့ ဆည်ကျရေစီးဆင်းရာလမ်းကြောင်းတွေမှာ ရှိတဲ့ကျေးရွာတွေကို နေရာ ချက်ခြင်းပြောင်းရွေ့ ကြဖို့ အေအေ က သတိပေး ထုတ်ပြန်ခဲ့ပါတယ်။
အဲဒီနောက် သူဌေးချောင်းရေအားလျှပ်စစ်စီးမံကိန်း နဲ့ အနီးဝန်းကျင်က ရွှေလှေ၊ လင်းသီ၊ ဇီးကျွန်း၊ သပြုချိုင်၊ နတ်မော် အပါအဝင် ကျေးရွာပေါင်း (၁၀) ကျော်က ဒေသခံပြည်သူတွေကို အာရက္ခတပ်တော် အေအေ က ဘေးလွတ်ရာ နေရာတွေ စတင်ပြောင်းရွေ့ပေးခဲ့တာ ဖြစ်တယ်လို့ အေအေ ရဲ့ ခိုင်းလုံတဲ့ သတင်း အရင်းအမြစ် ကပြောပါတယ်။
“ရေကတော့ လက်ရှိအချိန်ထိ ကျသွားတာတော့ မရှိသေးဘူး။စိုးရိမ်ရေအမှတ်မှာပဲရှိနေသေးတယ်။ဒေသခံပြည် သူတွေကို ကြေညာချက်ထုတ်ပြီး ညနေကတည်းကပင် ဘေးလွတ်ရာနေရာတွေကို အကုန်ပြောင်း ထားပြီး ပြီလို့”သူကပြောပါတယ်။အဲဒီသူဌေးချောင်းရေအားလျှပ်စစ်စီမံကိန်းကို ၂၀၀၈ ခုနှစ်ကတည်းကပင် စတင်တည်ဆောက်ခဲ့တာဖြစ်ပြီး ၂၀၂၄ ခုနှစ် မှာ ၁၁၁ မဂ္ဂါဝပ် ဓာတ်အားပေး စက်ရုံ တည်ဆောက်ကာ နှစ်စဉ်ပျမ်းမျှ လျှပ်စစ်ဓာတ်အား ကီလိုဝပ် နာရီသန်းပေါင်း ၃၈၆ သန်း ထုတ်လုပ်နိုင်ဖို့ သတ်မှတ်ချက် ချထားခဲ့တဲ့ စီမံကိန်း တစ်ခုလည်း ဖြစ်ပါတယ်။
အဲဒီနောက် ရခိုင် တကျော့ပြန်တိုက်ပွဲစတင်ချိန်မှာ သံတွဲမြို့နယ် အတွင်းမှာ အာရက္ခတပ်တော် အေအေ နဲ့ စစ်ကောင်စီတပ်တို့ ဟာ ဧပြီလ ၂၂ ရက်နေ့ မှာ တိုက်ပွဲ စတင်ဖြစ်ပွါးခဲ့ပြီးနောက် အဲဒီသူဌေးချောင်း ရေအားလျှပ်စစ် အနီးဝန်းကျင်ကို အေအေ သိမ်ပိုက် ရယူနိုင်ခဲ့တာလည်း ဖြစ်ပါတယ်။
