မြန်မာနိုင်ငံအတွင်းမှာ ရေဘေးကြောင့် မြို့နယ် ၅၆ ခုက လူဦးရေ ၃၂၀,၀၀၀ကျော်ကို အရေးပေါ်ပြောင်းရွေ့ထားရတယ်လို့ စစ်ကောင်စီ က ပြီးခဲ့တဲ့ စက်တင်ဘာလ ၁၅ ရက်နေ့က စစ်ကောင်စီလက်အောက်ခံ နိုင်ငံပိုင်သတင်းစာကနေ သတင်းထုတ်ပြန်လာ ခဲ့ပါတယ်။
တောင်တရုတ်ပင်လယ်မှာ ဖြစ်ပေါ်ခဲ့ အင်အားကြီး ဆိုင်ကလုန်းမုန်တိုင်း “ရာဂိ” အရှိန်ကြောင့် နေပြည်တော်၊ ကယား၊ ပဲခူး၊ မန္တလေး၊ မွန်၊ ရှမ်း၊ မကွေး၊ ဧရာဝတီ၊ ကရင်အပါအဝင် မြန်မာနိုင်ငံအတွင်းမှာ ရှိတဲ့ မြို့ နယ် ၅၆ ခုဟာ ရေဘေးဒဏ်ကို ခံစားနေကြရပါတယ်။
စက်တင်ဘာလ ၁၄ ရက်နေ့ထိ စာရင်းအရ ရေကြီး၊ ရေလျှံ၊ မြေပြိုတာမှုတွေကြောင့် နိုင်ငံတစ်ဝန်းလုံးက ရွှေ့ပြောင်းခဲ့ရတဲ့နေအိမ် ၇၂,၉၀၀ ကျော်ရှိ အိမ်ထောင်စုပေါင်း ၇၈၀၀၀ ကျော် လူဦးရေအနေနဲ့ကတော့ ၃၂၀,၀၀၀ ကျော်ကို ဘေးကင်းရာ ယာယီကယ်ဆယ်ရေးစခန်းတွေကို ရွှေ့ပြောင်းခဲ့ရတယ်လို့စစ်ကောင်စီရဲ့ထုတ်ပြန်ချက်ကဆိုပါတယ်။
ဒါ့အပြင် နိုင်ငံတစ်ဝန်းလုံးမှာ သေဆုံးသူ ၁၁၃ ဦး၊ ပျောက်ဆုံးသူ ၆၄ ဦး၊ ဒဏ်ရာရရှိသူ ၁၄ ဦးရှိခဲ့ပြီး ပျောက်ဆုံးသူတွေကိုလည်း အမြန်ဆုံးရှာဖွယ်နေတယ်လို့ ဆိုပါတယ်။
ဒီလိုဖြစ်ပွားနေတဲ့ သဘာဝဘေးအန္တရာယ်နဲ့ပတ်သက်ပြီး စစ်ကောင်စီအစိုးရအနေ နဲ့ ကူညီကယ်ဆယ်ရေး၊ ပြန်လည်ထူ ထောင် ရေးလုပ်ငန်းတွေကို အမြန်ဆုံးနဲ့ အကောင်းဆုံးဖြစ်အောင် စီစဉ်ဆောင်ရွက်နေတယ်လို့လည်းထုတ်ပြန်ထားပါတယ်။
