မင်းပြားမြို့နယ်အတွင်းမှာ ပြီးခဲ့တဲ့ စက်တင်ဘာလ ဒုတိယအပတ်ကစတင်ပြီး မိုးအဆက်မပြတ်ရွာသွန်းခဲ့တာကြောင့် စက်တင်ဘာလ ၁၄ ရက်နေ့မှာတော့ ရခိုင်ရိုးမအနီးမှာရှိတဲ့ဖုံသာချောင်းထဲကို တောင်ကျရေ အလုံးအရင်း နဲ့ စီးဆင်းလာခဲ့ပြီး ဖုံသာချောင်းတစ် ကမ်းနားတစ်လျှောက်မှာရှိတဲ့ ကျေးရွာ ၁၃ ရွာက နေအိမ် ၂၆၀ ကျော်ဟာ ရေစီးနဲ့ အတူမျှောပါ ပျက်စီးသွားခဲ့ရတယ်လို့ ဒေသခံတွေကပြောပါတယ်။
အဲဒီလို ရေစီးနဲ့အတူ မျောပါပျက်စီးသွားခဲ့ရတဲ့ ကျေးရွာ ၁၃ ရွာထဲကတော့ ကိုင်းကြီး၊ ကျေးမကြီး၊ ကျေးမချေ၊ ပြင်ချောင်း၊ ပြင်ဝ၊ သရက်အုပ်၊ နတ်ထောက် (ရွာသစ်/ရွာဟောင်း)၊ ရွာသာယာ၊ ခချီးမြောင် (အောက်၊ အထက်)၊ ဇိုင်ချောင်း နဲ့စိတ္တရကျေးရွာ တွေဖြစ်ကြတယ်လို့ဆိုပါတယ်။
အဲဒီကျေးရွာတွေက ဒေသခံတွေဟာ ရေကြီးမှုဒဏ်ကြောင့် နေအိမ်တွေ ပျက်စီးတာ၊စိုက်ပျိုးထားတဲ့ လယ်ယာမြေတွေ ပျက်စီးတာတွေလည်း များစွာရှိနေတယ်လို့ ရေဘေးဒဏ်ကို ခံနေကြရတဲ့ စိတ္တရကျေးရွာ ဒေသခံတောင်သူတစ်ဦးကပြောပါတယ်။
“ဖုံသာချောင်းတစ်လျှောက်မှာရှိတဲ့လယ်ဧက သောင်းချီပြီးပျက်စီးနေပါတယ်။ကျနော်တို့က ဒီတစ်ကြိမ်တည်း ပျက်စီးလာတာတော့ မဟုတ်ဘူး ဒီနှစ်ထဲမှာဖုံသာချောင်းက မြေနိမ့်ပိုင်းဒေသမှာ ရှိတဲ့ မြေနိမ့်ပိုင်းနေရာကလူတွေကတော့ ၂ ကြိမ် ၃ ကြိမ်ခံထားကြရပြီးပြီ။ပျက်စီးမှုတွေကတော့ တော်တော်များနေပါတယ်လို့”သူကပြောပါတယ်။
အဲဒီဖုံသာချောင်းအနီးတဝိုက်မှာရှိတဲ့ ကျေးရွာ ၂၆ ရွာခန့်ဟာ အခုလို ရေဘေးဒဏ်ကိုနှစ်စဉ်လိုလို ခံစားနေကြရတာ ဆိုပေမယ့် အကူအညီတစ်စုံ တရာ မရရှိတာတွေကြောင့် အကူအညီပေးဖို့လိုအပ်နေတယ်လို့ ဒေသခံတွေကတောင်းဆိုကြပါတယ်။
“ကျနော်တို့အကူအညီတွေ ရတာမရှိဘူးရောက်လည်းမရောက်ကြဘူး ။ပျက်စီးမှုတွေကို စာရင်းလာယူတာတွေတော့ ရှိတယ် ဒါပေမယ့်တစ်ခါမှတော့ ရတာမရှိဘူး။လယ်သမားတွေဆီကို ပျက်စီမှုစာရင်းတွေလာယူတယ်ပြီးတော့တစ်ခါမှလည်း မရောက်လာကြဘူးလို့”သူကပြောပါတယ်။
လက်ရှိမှာအဲဒီမင်းပြားမြို့နယ်ဟာ အာရက္ခတပ်တော် အေအေ ထိန်းချုပ်မှုအောက်မှာရှိနေတဲ့ မြို့နယ်တစ်ခုလည်းဖြစ်ပါတယ်။
