မနေ့လှုပ်ခတ်ခဲ့တဲ့ မြေငလျင်ဒဏ်ကြောင့် ဒဏ်ရာရ လူနာတွေမှာ အရေးပေါ်သွေးလိုအပ်ချက်တွေ ရှိနေတယ်လို့ စစ်ကောင်စီရဲ့ သတင်းထုတ်ပြန်ရေး အဖွဲ့ခေါင်းဆောင် ဇော်မင်းထွန်းက သတင်းထုတ်ပြန်ပြောဆိုလာပါတယ်။
“မန္တလေး၊နေပြည်တော်၊စစ်ကိုင်းမှာ ရှိတဲ့ ဆေးရုံတွေမှာ ငလျင်ဒဏ်ကြောင့်ဒဏ်ရာရလူနာတွေ များပြားနေပါတယ်။အဲဒီမှာ သွေးလိုအပ်ချက်လည်းများပြားပါတယ်။မန္တလေး၊နေပြည်တော်၊စစ်ကိုင်းမှာ ရှိတဲ့ သွေးအလှူရှင်များ အမြန်ဆုံးဆက်သွယ်ပြီးတော့ ကုသိုလ်ပြုပေးကြပါလို့ မေတ္တာရပ်ခံချင်ပါတယ်”လို့ စစ်ကောင်စီရဲ့ သတင်းထုတ်ပြန်ရေး အဖွဲ့ခေါင်းဆောင် ဇော်မင်းထွန်းက ပြောဆိုထားပါတယ်။
မနေ့က ညနေထိ စစ်ကောင်စီရဲ့ သတင်းထုတ်ပြန်ချက်အရ ကတော့ ငလျင်ဒဏ်ကြောင့် သေဆုံးသူ ဦးရေဟာ ၁၄၄ ဦး နဲ့ ဒဏ်ရာရသူ ၇၃၂ ဦးရှိနေပြီး လတ်တလောမှာ ကူညီကယ်ဆယ်ရေးတွေ ဆက်လက်လုပ်ဆောင်တာတွေ ရှိနေတဲ့ အတွက် နောက်ထပ် အနေ နဲ့ သေဆုံး ဒဏ်ရာရသူ ဦးရေဟာ ထပ်တိုးလာနိုင်တယ်လို့လည်း စစ်ခေါင်းဆောင် မင်းအောင်လှိုင်က ပြောဆိုထားပါတယ်။
မနေ့က မတ်လ ၂၈ ရက်နေ့ ၁၂ နာရီ ၅၈ မိနစ်မှာ လှုပ်ခတ်ခဲ့တဲ့ ၇.၇ ပြင်းအားရှိ မြေငလျင် ရဲ့ နောက်ဆက်တွဲ ငလျင်လှုပ်ခတ်မှုတွေဟာ မွန်းလွဲ ၁ နာရီ ၂မိနစ် မှာ ၇ ဒသမ ၅ တစ်ကြိမ်၊ မွန်းလွဲ ၁ နာရီ ၁၆ မိနစ်မှာ ၅ ဒသမ ၉ တစ်ကြိမ်၊မွန်းလွဲ ၁ နာရီ ၅၈ မိနစ် မှာ ၄ ဒသမ ၇တစ်ကြိမ်၊ မွန်းလွဲ ၂ နာရီ ၂၆ မိနစ်မှာ ၄ ဒသမ ၉ ပြင်းအား ရှိတဲ့ နောက်ဆက်တွဲ ငလျင်တစ်ကြိမ်လှုပ်ခတ်ခဲ့တာရှိပြီးတော့ နောက်ထပ် ငလျင်လှုပ်ခတ်မှု ထပ်မံ ရှိလာနိုင်တဲ့ အတွက် ပြည်သူတွေ အနေ နဲ့ သတိထား နေထိုင်ကြဖို့ကိုလည်း မိုး/ဇလက အသိပေးထုတ်ပြန်ပြောဆိုထားပါတယ်။
