ငလျင်သင့် ဒေသတွေကို စစ်ကောင်စီအနေ နဲ့ ဖုန်းနဲ့ အင်တာနက်ဆက်သွယ်ရေးလိုင်းတွေကို အကန့်အသတ်မရှိ ပြန် ဖွင့်ပေးဖို့ Athan – အသံအဖွဲ့က အကြံပြုတောင်းဆိုလာပါတယ်။
ငလျင်ဒဏ်ကြောင့် ကယ်ဆယ်ရေး၊ သောက်သုံးရေ၊ အသင့်စား အစားအစာ၊ ဆေးဝါးတွေနဲ့လျှပ်စစ်မီး အဓိကလိုအပ်နေတဲ့ ဒေသတွေမှာ စစ်ကောင်စီက နောက်ထပ်အခြေခံ လိုအပ်ချက်ဖြစ်တဲ့ ဖုန်းနဲ့ အင်တာနက်ဆက်သွယ်ရေးလိုင်းတွေကို ဆက်လက်ဖြတ်တောက်ထားတာကြောင့် သတင်းစီးဆင်းမှုဟာ အလွန်အားနည်းလျက်ရှိတယ်လို့ ဆိုပါတယ်။
ငလျင်ဒါဏ်ကို အများဆုံးခံစားခဲ့ရတဲ့ စစ်ကိုင်း၊ မန္တလေး၊ ပဲခူးနဲ့ ရှမ်းပြည်နယ်တောင်ပိုင်းက ဒေသတချို့မှာဆိုရင် ငလျင်မလှုပ်ခတ်မီ အစောပိုင်းကာလတွေထဲကပင် စစ်ကောင်စီက ဆက်သွယ်ရေးဖုန်းနဲ့ အင်တာနက်လိုင်းတွေကို ဖျက်တောက်ထားခဲ့တာပါ။
ငလျင်လှုပ်ပြီးနောက်ပိုင်း ယခုလိုကာလမျိုးမှာဆိုရင် အဆောက်အဦးများစွာ ပြိုကျပျက်စီးခဲ့တာကြောင့် ဆက်သွယ်ရေးလိုင်းတွေမှာ ယခင်ထက်ပိုပြီး ပြတ်တောက်နေနိုင်တယ်လို့လည်း အသံအဖွဲ့က သုံးသပ်ထားပါတယ်။
ဆက်သွယ်ရေးဖုန်းလိုင်းနဲ့ အင်တာနက်လိုင်းတွေဖြတ်တောက်ခံထားရတဲ့ ဒေသတွေမှာ ဘဏ်လုပ်ငန်းတွေရပ်နားထားရပြီး၊စီးပွားရေးအကြပ်အတည်းတွေနဲ့ ရင်ဆိုင်နေကြရသလို၊ ဒေသခံတွေအနေနဲ့လည်း ရပ်ဝေးက မိသားစုဝင်တွေနဲ့ အဆက်အသွယ်ပြတ်တောက်တာ၊ အခြေခံကျန်းမာရေးသတင်းအချက်အလက်တွေရရှိနိုင်မှု အကန့်အသတ်တွေနဲ့ ကြုံတွေ့ရတာ၊ အရေးပေါ်ကိစ္စရပ်တွေနဲ့ ဆက်စပ်တဲ့ သတင်းလက်ခံရရှိမှုတွေအားနည်းတာ စတဲ့လိုအပ်ချက်တွေနဲ့ ပြည့်နှက်နေတယ်လို့လည်း အသိပေးထားပါတယ်။
ဒါ့အပြင် နောက်ဆက်တွဲအကျိုးဆက်အနေနဲ့ယခုကဲ့သို့ အင်အားပြင်းထန်လွန်းလှတဲ့ သဘာဝဘေးအန္တရာယ်တွေနဲ့ ရင်ဆိုင်ရချိန်မှာ ဆက်သွယ်ရေးလိုင်းတွေဖြတ်တောက်ခံရတဲ့ ဒေသတွေမှာ ပြည်သူတွေ သတင်းစီးဆင်းမှုရပ်တန့်နေတဲ့အတွက် ကြိုတင်ပြင်ဆင်၊ ကာကွယ်မှုတွေကို အချိန်မှီမပြုလုပ်နိုင်ဘဲ လူ့အသက်ပေါင်းများစွာ ပေးဆပ်ခဲ့ရတယ်လို့လည်း အသံအဖွဲ့က ထုတ်ပြန်ထားပါတယ်။
ငလျင်လှုပ်ခတ်ပြီး နာရီပေါင်းများစွာကြာသည့်တိုင်အောင် ငလျင်ဒါဏ်ခံစားခဲ့ရတဲ့ ဒေသတွေမှာ မြေပြင်သတင်းတွေကို သတင်းဌာနတွေကို ပေးပို့ရာမှာ ကြန့်ကြာတာ၊ ကယ်ဆယ်ရေးနဲ့ လူသားချင်းစာနာထောက်ထားမှုဆိုင်ရာ အကူအညီတွေကြန့်ကြာတာနဲ့ လုံလောက်စွာ မရရှိခြင်းတို့ဟာလည်း စစ်ကောင်စီရဲ့ ဆက်သွယ်ရေးလိုင်းတွေဖြတ်တောက်ထားခြင်းနဲ့ တနည်းတဖုံဆက်စပ်နေတယ်လို့လည်း အသံအဖွဲ့က ဆိုပါတယ်။
