CNA၊မြတ်သူ။
ဖေဖော်ဝါရီလ ၊ ၇ ။
တောင်ကုတ်မြို့နယ်အတွင်းမှာ စစ်ပွဲအတွင်းက စစ်ကောင်စီက ထောင် ထားခဲ့တဲ့ မြေမြုပ်မိုင်းကို နင်းမိပြီး အမျိုးသမီးတစ်ဦး ခြေထောက်တစ်ဖက်ပြတ်ထွက်သွားခဲ့ရတယ်လို့ ဒေသခံတွေက ပြောပါတယ်။
ဖြစ်စဥ်မှာ မနေ့က ဖေဖော်ဝါရီလ ၆ ရက်နေ့ ညနေ ၃ နာရီလောက်မှာ တောင်ကုတ်မြို့ ကံပိုင်ရပ်ကွက်အတွင်းက အသက် ၅၁ နှစ်အရွယ် ဒေါ်ခင်မျိုးချေဆိုတဲ့ အမျိုးသမီးဟာ တောင်ကုတ်မြို့ ခမရ ၃၄၆ တပ်အနီးမှာရှိတဲ့ နေအိမ်ခြံ အတွင်း ထင်းခွေဖို့အသွားမှာ အခုလို စစ်ကောင်စီတပ်တွေထောင်ထားတဲ့ စစ်ကျန်လက်နက်မိုင်းကို နင်းမိခဲ့တာဖြစ်တယ်လို့ တောင်ကုတ်မြို့ခံ တစ်ဦးကပြောပါတယ်။
“ဘယ်ဘက်ခြေထောက်ပြတ်သွားတယ်။ထင်းသွားခွေတာလို့ ဖြစ်တာလို့သိရတယ်။အခုတော့ ဆေးကုသပေးနေတယ်။ အဓိကတော့ စစ်ကောင်စီတပ်ရင်းတွေ နဲ့ နီးတဲ့ နေရာတွေက အန္တရာယ်ရှိတယ်”လို့ သူကပြောပါတယ်။
တောင်ကုတ်မြို့ တစ်ခုလုံးကို အာရက္ခတပ်တော်ဟာ စစ်ကောင်စီလက်ထဲကနေ ပြီးခဲ့တဲ့ ၂၀၂၄ ခုနှစ် ဒီဇင်ဘာလ ၁၄ ရက်နေ့မှာ အပြီးသတ်သိမ်းပိုက်ရရှိခဲ့ပြီးဖြစ်ပါတယ်။
အဲဒီလို အာရက္ခတပ်တော်က အပြီးသတ်သိမ်းပိုက်ရရှိထားပြီးဖြစ်တဲ့ တောင်ကုတ်မြို့မှာ စစ်ပွဲအတွင်းက စစ်ကောင်စီထောင်ထားတဲ့ မိုင်း နဲ့ မပေါက်ကွဲဘဲ ကျန်နေသေးတဲ့ စစ်ကျန်လက်နက်တွေကို ပြည်သူတွေ အန္တရာယ်မဖြစ်ပွါး ရအောင် အာရက္ခပြည်သူ့အစိုးရအနေ နဲ့ ရှင်းလင်းတာ ၊အသိပညာပေးဟောပြောတာကို အခုထက်ပိုမိုလိုဖို့လိုအပ်နေတယ်လို့လည်း တောင်ကုတ်ဒေသခံတစ်ဦးက တောင်းဆိုပါတယ်။
“မလုပ်တာတော့မဟုတ်ဘူးလုပ်နေတယ် ဒီထက်ပိုပြီးတော့ လုပ်ဖို့လိုတယ်။နောက်တစ်ခုက ဒီမိုင်းတွေ စစ်ကျန်လက်နက်တွေ နဲ့ ပတ်သက်ပြီး အသိပညာပေး လုပ်ငန်းတွေကိုလည်း သေသေချချာလေး လုပ်ပေးစေချင်တယ်”လို့ သူကတောင်းဆိုပါတယ်။
ပြီးခဲ့တဲ့ ဖေဖော်ဝါရီလ ၃ ရက်နေ့ကလည်း ဂွမြို့နယ်အတွင်းက တိုင်ကျိုးကျေးရွာ မှာ စစ်ကျန်လက်နက်ကို ဆော့ကစားရာကနေ ပေါက်ကွဲပြီးတော့ ကလေးငယ် တစ်ဦး အပါအဝင် ၃ ဦးသေဆုံးခဲ့ရပြီး ၂ ဦးအပြင်းအထန် ဒဏ်ရာရရှိသွားခဲ့တာ ရှိခဲ့ပါသေးတယ်။
ပုံ ၊ ရိုးမအလင်္ကာ
