မတ်လ ၊ ၄ ။
စစ်တွေမြို့နယ်အတွင်းမှာ စစ်ကောင်စီတပ်တွေ နဲ့ အာရက္ခတပ်တော်တို့ နှစ်ဖက်ပစ်ခတ်မှုတွေ ဒီရက်ပိုင်းအတွင်းမှာ ရပ်တန့်နေတယ်တယ်လို့ စစ်တွေ မြို့ သတင်းရင်းမြစ်တွေက ပြောပါတယ်။
စစ်တွေမြို့နယ်အတွင်းမှာ ရှိတဲ့ စစ်ကောင်စီ ရဲ့ စစ်တွေ ဒကစဌာနချုပ်အပါအဝင် တပ်စခန်း ၄ နေရာကို အာရက္ခတပ်တော် အေအေဟာ ပြီးခဲ့တဲ့ ဖေဖော်ဝါရီလ ၁၇ ရက်နေ့ ကတည်းကပင် လက်နက်ကြီးတွေ နဲ့ ထိုးစစ်ဆင်ပစ်ခတ်တိုက်ခိုက်ခဲ့တဲ့ အတွက် အဲဒီနောက်ပိုင်းမှာ စစ်ကောင်စီတပ်တွေ နဲ့ အာရက္ခတပ်တော် တို့ရဲ့ လက်နက်ကြီး လက်နက်ငယ်တွေ နဲ့ နှစ်ဖက်ပစ်ခတ်တိုက်ခိုက်မှုတွေ ဟာ အဲဒီနောက်ပိုင်းမှာ ဆက်တိုက်လိုလို ရှိခဲ့ပါတယ်။
အဲဒီနောက် မတ်လ ၁ ရက်နေ့ကတည်းကပင် အဲဒီလို နှစ်ဖက်ပစ်ခတ်မှုတွေဟာ ရပ်တန့်သွားခဲ့ရပြီး လက်ရှိ ပစ်ခတ်သံတွေ မကြားရတာဟာ ၂ ရက်ရှိသွားပြီးဖြစ်တယ်လို့ စစ်တွေ မြို့ခံတစ်ဦးက CNA ကို ပြောပါတယ်။
“လက်ရှိပစ်ခတ်သံတွေ မကြားရတာတော့ ၂ ရက်ရှိသွားပြီ အရင်တုန်းကဆိုရင် ဝါဘို ၊ရွှေမင်းဂံ နဲ့ ရေချမ်းပြင်ဘက်က ပစ်ခတ်သံတွေ ကြားရတယ် လက်နက်ကြီး လက်နက်ငယ်သံတွေ ပေါ့ အခုမကြားရတော့ဘူး.။ဘာဖြစ်လို့ ရပ်သွားတာလဲ ဆိုတာတော့ ကျနော်တို့ မသိဘူး။ပစ်ခတ်သံရပ်သွားပေမယ့် ဘယ်လို စိုးရိမ်ကင်းပါမလဲ ဘယ်နေ့ထဖြစ်လာမလဲ ဆိုတာကိုတော့ စိုးရိမ်နေရတာပေါ့”လို့ သူကပြောပါတယ်။
အဲဒီလို နှစ်ဖက်ပစ်ခတ်တာတွေ ရပ်တန့်နေပေမယ့် စစ်ကောင်စီကတော့ ရေကြောင်းကနေ စစ်လက်နက်တွေ နဲ့ ရိက္ခာတွေ ဖြည့်တင်းတွေကိုဆက်လက်လုပ်ဆောင်နေတာ ရှိနေသလို စစ်မှူးထမ်း အတွက် မွတ်ဆလင်တွေကိုလည်း စစ်သင်တန်းပေးတာတွေ ဆက်တိုက်ရှိနေတယ်သေးတယ်လို့ စစ်တွေမြို့ခံတွေကပြောပါတယ်။
ဒါ့အပြင်တစ်ဖက်မှာလည်း စစ်တွေ မြို့တွင်းက စစ်ဘေးရှောင်ထွက်မဲ့သူတွေကို စစ်ကောင်စီကထွက်ခွင့်ပိတ်ထားတာကြောင့် စစ်တွေမြို့တွင်းမှာ ပိတ်မိနေကြရဆဲ ဖြစ်တယ်လို့လည်း စစ်တွေ မြို့ခံတစ်ဦးက ဆိုပါတယ်။
“စစ်ရှောင်ထွက်တာက လေယာဉ်နဲ့ ရန်ကုန်ကိုထွက်ရရင်တော့ ထွက်ခွင့်ပေးတယ် ဒီကလွတ်မြောက်နယ်မြေတွေကိုတော့ ထွက်ခွင့်မပေးဘူး တချို့က ကိုယ့်နည်းကိုယ့်ဟန် နဲ့ တော့ခိုးထွက်တာတော့ ရှိကြတယ် ငွေကတော်တော်ကုန်တယ် လူတိုင်းက အဲဒီလို မထွက်နိုင်ဘူး”လို့ သူကပြောပါတယ်။
လက်ရှိ ရခိုင်တစ်ပြည်လုံးမှာ စစ်ကောင်စီတပ်တွေ ဟာ စစ်တွေ၊ကျောက်ဖြူ နဲ့ မာန်အောင်မြို့တွေမှာသာ တပ်စခန်းတွေ ရှိတောာ့တာ ဖြစ်ပြီး စစ်ကောင်စီ အနေ နဲ့ အဲဒီမြို့နယ်တွေက တပ်စခန်းတွေ မကျရှုံးစေရေးအတွက် စစ်စခန်းတွေ အခိုင်အမာတည်ဆောက်တာ၊စစ်လက်နက်ကြီးတွေတပ်ဆင်တာ၊ ရေတပ်အင်အားတွေ အဆမတန်ဖြည့်တင်းတာတွေ အပြင် အာရက္ခတပ်တော် နဲ့ နှစ်ဖက်တိုက်ပွဲပြင်းထန်လာခဲ့ရင် အရပ်သားပြည်သူတွေကို လူသားဒိုင်းအနေ နဲ့ အသုံးပြုနိုင်ဖို့ အတွက် စစ်ရှောင်ထွက်ခွင့် မပေးတာ စတာတွေကို ဆက်တိုက်လုပ်ဆောင်တာတွေ လည်း ရှိနေတာ ဖြစ်ပါတယ်။
စစ်ကောင်စီတပ်တွေ နဲ့ အာရက္ခတပ်တော်တို့ဟာ ပြီးခဲ့တဲ့ ၂၀၂၃ ခုနှစ် နိုဝင်ဘာလ ၁၃ ရက်နေ့ကတည်းကပင် နှစ်ဖက်တိုက်ပွဲတွေ ဖြစ်ပွါးခဲ့တာ ဖြစ်ပြီး တစ်နှစ်ကျော်တိုက်ပွဲ ကာလအတွင်းမှာ စစ်ကောင်စီက အနှစ်နှစ်အလလက တပ်စွဲနေထိုင်ခဲ့တဲ့ တပ်စခန်းဌာနချုပ်မြောက်များစွာ နဲ့ အတူ ရခိုင်က မြို့နယ် ၁၄ ခု နဲ့ပလက်ဝဒေသကို အပြီးသတ်သိမ်းပိုက်နိုင်ခဲ့ပြီးဖြစ်သလို စစ်ကောင်စီ အရာရှိ ဗိုလ်မှူးတွေ အပါအဝင် စစ်သုံးပန်းမြောက်များစွာကိုလည်းဖမ်းဆီးရမိခဲ့ပြီး ဖြစ်ပါတယ်။
