ရှမ်းပြည်နယ်မြောက်ပိုင်းမှာ KIAနဲ့ TNLAတို့အကြားဖြစ်ပွားနေတဲ့ အငြင်းပွားမှုတွေကို နှစ်ဖက် မျက်နှာချင်းဆိုင် တွေ့ဆုံညှိနှိုင်းဖို့ အမျိုးသားညီညွတ်ရေးအစိုးရ(NUG)က ထုတ်ပြန် တိုက်တွန်းလာပါတယ်။
ရှမ်းမြောက်ဒေသမှာဖြစ်ပေါ်နေတဲ့ မြေပြင်အငြင်းပွားမှုအချို့ဟာ ဒေသခံပြည်သူတွေသာမက နွေဦးတော်လှန်ရေးမှာ ပါဝင်နေကြတဲ့ ပြည်သူလူထုတရပ်လုံးအတွက်ပါ စိုးရိမ်ပူပန်မှုတွေ ဖြစ်ပေါ်နေတာကို တွေ့ရတယ်လို့ ဆိုပါတယ်။
ဒီအငြင်းပွားမှုအပေါ် KIAနဲ့ TNLAနှစ်ဖက်အဖွဲ့အစည်းခေါင်းဆောင်တွေကလည်း မိတ်ဖက်ပဋိပက္ခအဖြစ်သာ ရှုမြင်ကြောင်းနဲ့ နိုင်ငံရေးနည်းဖြင့်သာ ဖြေရှင်းမယ်ဆိုတဲ့ သန္နိဋ္ဌာန်ချမှတ်ထားတာကို ကြားသိရတဲ့အတွက် အထူးကြိုဆိုကြောင်းကိုလည်း NUG က အသိပေးထားပါတယ်။
KIAနဲ့ TNLAတို့အကြား နိုင်ငံရေးကိစ္စတွေကို နိုင်ငံရေးနည်းလမ်းနဲ့ ငြိမ်းချမ်းစွာ ဖြေရှင်းဆောင်ရွက်ရာမှာ NUGအနေနဲ့လည်း လိုအပ်သလို ကူညီဆောင်ရွက်ဖို့ အသင့်ရှိတယ်လို့လည်း ထုတ်ပြန်ချက်မှာဖော်ပြထားပါတယ်။
အဖက်ဖက်မှာ အင်အားချိနဲ့ အရေးနိမ့်လျက်ရှိတဲ့ စစ်ကောင်စီအဖို့ တော်လှန်ရေး အင်အားစုတွေအကြား သပ်လျှိုသွေးခွဲရေးဟာ ၎င်းတို့ရဲ့ အဓိကဗျူဟာ ဖြစ်လာတယ်ဆိုတဲ့ အချက်ကိုလည်း အားလုံးက သတိပြုပြီးဖြစ်တယ်လို့ NUGက ဆိုပါတယ်။
ဒါကြောင့် လတ်တလော ပေါ်ပေါက်နေတဲ့ အောက်ခြေ ပွတ်တိုက်မှုတွေကို လူမျိုးရေးအမုန်းတရားဆီ အပြန့်ကျယ်မသွားစေဖို့အတွက် နှစ်ဖက်အဖွဲ့ အစည်းခေါင်းဆောင်တွေအနေနဲ့ ထိန်းကျောင်းဆောင်ရွက်နိုင်မယ်ဆိုတာကို ယုံကြည်တယ်လို့လည်း အသိပေးထားပါတယ်။
၁၉၇၆ ခုနှစ်၊ ဖေဖော်ဝါရီ ၁၄ ရက်နေ့တုန်းကကချင်ပြည်လွတ်လပ်ရေးအဖွဲ့နဲ့ ပလောင်ပြည်နယ် လွတ်မြောက်ရေးအဖွဲ့တို့ “ညီညွတ်ရေးမဟာမိတ်စာချုပ်”ကို ချုပ်ဆိုခဲ့ကြတယ်ဆိုတဲ့ အကြောင်းကိုလည်း NUGရဲ့ ထုတ်ပြန်ချက်မှာဖော်ပြထားပါသေးတယ်။
အဲ့ဒီစာချုပ်မှာ ကချင်နဲ့ ပလောင်အမျိုးသားတွေဟာ နယ်မြေချင်းကပ်လျက်အေးအတူပူအမျှ အတူတကွ နေထိုင် လုပ်ကိုင် စားသောက်လာခဲ့ကြတဲ့ အမျိုးသားတွေဖြစ်ကြောင်းနဲ့ နိုင်ငံရေးခံယူချက်ချင်း တူညီကြကြောင်း အတိအလင်းဖော်ပြထားတယ်လို့ ဆိုပါတယ်။
ဒါ့အပြင် စာချုပ်ပါ အရေးအကြီးဆုံး မှတ်သားအပ်တဲ့အချက်မှာ “အဖွဲ့အစည်းနှစ်ဖွဲ့ကြား ဖြစ်ပေါ်လာတတ်သည့် မည်သည့် ပဋိပက္ခမျိုးကို မဆို မိတ်ဖက်ပဋိပက္ခ ဖြေရှင်းနည်းဖြင့်သာ ဖြေရှင်းသွားမည်” ဆိုတဲ့ အချက်ဖြစ်တယ်လို့ NUGက အသိပေးထားပါတယ်။
