တော်လှန်ရေး ၄နှစ်တာကာလအတွင်းမှာ တိုက်ပွဲပေါင်း ၃၂၆ ပွဲဆင်နွှဲခဲ့ပြီး ရဲဘော် ၅၂ဦးကျဆုံးခဲ့ရတယ်လို့ CDF – Hakhaက ထုတ်ပြန်လာပါတယ်။
CDF-Hakhaဟာ အာဏာရှင်စနစ်အမြစ်ပြတ်ချေမှူန်းရေး၊ ဖယ်ဒရယ်ပြည်ထောင်စု တည်ဆောက်ရေးနဲ့ ကိုယ်ပိုင်ပြဌါန်းခွင့်တို့အတွက် ၂၀၂၁ခုနှစ်၊ မတ်လ ၂၁ရက်နေ့မှာ စတင်ဖွဲ့စည်းခဲ့တာဖြစ်ပြီး၊ ဒီကနေ့ မတ်လ ၂၁ရက်မှာ တပ်ဖွဲ့ ဖွဲ့စည်းတည်ထောင်တာ ၄နှစ်ပြည့်မြောက်ခဲ့တာလည်းဖြစ်ပါတယ်။
တော်လှန်ရေး ၄နှစ်တာကာလအတွင်းမှာCDF – Hakhaအနေနဲ့ တိုက်ပွဲပေါင်း ၃၂၆ပွဲဆင်နွှဲခဲ့ပြီး၊ အထူးသဖြင့် ဟားခါးမြို့နယ်အတွင်းမှာစစ်ကောင်စီစစ်ကြောင်းကို ၁၇ ကြိမ်၊ ဟားခါးမြို့တွင်းစစ်ဆင်ရေးအနေနဲ့ တိုက်ပွဲပေါင်း ၁၅၀ ကြိမ်တို့ဆင်နွှဲနိုင်ခဲ့တယ်လို့ ဆိုပါတယ်။
အခြားသောမြို့နယ်တွေမှာလည်း စစ်ကောင်စီစစ်ကြောင်းကို တိုက်ခိုက်ပစ်ခတ်မှုမှာ ၈ ကြိမ်၊ စခန်းနဲ့ မြို့သိမ်း စစ်ဆင်ရေးတွေမှာ ၁၂ ကြိမ်ပါဝင်တိုက်ခိုက်ခဲ့တယ်လို့လည်း အသိပေးထားပါတယ်။
အဲ့ဒီတိုက်ပွဲတွေအတွင်း နိုင်ငံနှင့် လူမျိုးအတွက် CDF-Hakha ရဲဘော် ၅၂ဦး အသက်ပေးလှူခဲ့ရပြီး ရဲဘော် ၁၈၃ဦး ဒဏ်ရာရရှိခဲ့တယ်လို့ ထုတ်ပြန်ထားပါတယ်။
ဒါ့အပြင် တော်လှန်ရေး ၄နှစ်တာကာလအတွင်းမှာ စစ်ကောင်စီလက်ချက်ကြောင့် ဟားခါးမြို့နယ်အတွင်းက အပြစ်မဲ့ပြည်သူ ၂၃ဦးသေဆုံးခဲ့ရပြီး၊ နေအိမ် ၂၆၀လုံး မီးရှို့ဖျက်ဆီးခံခဲ့ရသလို မတရားဖမ်းဆီးနှိပ်စက်ခြင်းကိုခံရတဲ့ အပြစ်မဲ့ပြည်သူ ထောင်ကျော်ရှိခဲ့တယ်လို့လည်း CDF-Hakhaက အသိပေးထားပါတယ်။
CDF-Hakhaအနေနဲ့လည်း တိုင်းပြည်နှင့်လူမျိုးလွတ်မြောက်ရေးအတွက် တော်လှန်ရေးပြီးဆုံးသည့် တိုင်အောင် ပြည်သူလူထု၊ အခြားတော်လှန်ရေးအင်အားစုတွေနဲ့အတူ လက်တွဲကာ ဆက်လက်တိုက်ပွဲဝင်သွားမယ်လို့လည်း CDF-Hakhaက ထုတ်ပြန်ထားပါသေးတယ်။
