အာရက္ခတပ်တော် နဲ့ စစ်ကောင်စီတပ်တို့ဟာ ဂွမြို့ နဲ့ ၁၀ မိုင်ခန့်အကွာ ချင်းကုန်းကျေးရွာ နဲ့ ရွှေတွင်းတူ ကျေးရွာ အနောက်က တောင်ကြောတလျှောက်မှာ တိုက်ပွဲဖြစ်ပွားနေတာတွေရှိနေတယ်လို့ ဒေသခံတွေက ပြောပါတယ်။
အဲဒီတိုက်ပွဲဖြစ်ပွားရာနေရာတွေကို ဂွမြို့ အနီးပင်လယ်ပြင်မှာ ရှိနေတဲ့ စစ်ကောင်စီနေဗီက လက်နက်ကြီးပစ်ခတ်တာတွေ ရှိနေသလို စစ်ကူပို့ဆောင် ပေးနေတာတွေလည်း ရှိနေတယ် ဂွမြို့ဒေသခံ တစ်ဦးကပြောပါတယ်။
“ချင်းကုန်းရွာနဲ့ ရွှေတွင်းတူးရွာ နောက်ဘက်ခြမ်းတွေမှာ ဖြစ်နေတယ်။မြို့နဲ့ ဆယ်မိုင်လောက်အကွာမှာပေါ့။ဂွမြို့အနီးမှာ ရှိတဲ့ စစ်ကောင်စီသင်္ဘောကတော့ မနက်ကတည်းကပင် လက်နက်ကြီးနဲ့ ပစ်နေတာရှိတယ်။မြို့ထဲမှာတော့ပုံမှန်ပဲ။စစ်ကားတွေက သွားနေကြတယ်။ကား ငါးစီးလောက်က ပုံမှန်အဆင်းအတက်ရှိတယ်”လို့ သူကပြောပါတယ်။
အာရက္ခတပ်တော်ဟာ သံတွဲမြို့ နဲ့ ငပလီမြို့ကို ထိုးစစ်ဆင်တိုက်ခိုက်သိမ်း ပိုက်ပြီးနောက်မှာတော့ ဂွမြို့နယ်အတွင်းက ကျိန္တလီမြို့ကို သြဂုတ်လ ၁၀ ရက်နေ့မှာ ထိုးစစ်ဆင်တိုက်ခိုက်ခဲ့ပြီးနောက် အောက်တိုဘာလ ၆ ရက်နေ့မှာတော့ ကျိန္တလီမြို့ထဲက စစ်ကောင်စီတပ်စခန်းတွေ နဲ့ ကိုင်ခုံ နဲ့ ဂန့်ဂေါ်တောင် မှာ ရှိနေတဲ့ စစ်ကောင်စီတပ်စခန်းတွေကို အာရက္ခတပ်တော် က သိမ်းပိုက် နိုင်ခဲ့ပါတယ်။
အဲဒီလို အာရက္ခတပ်တော်ရဲ့ ထိုးစစ်ဟာ စစ်ကောင်စီတပ်စခန်းရှိရာ ခလရ – ၅၃၆ အနားကို ရောက်ရှိလာတာ နဲ့ အတူ စစ်ကောင်စီကလည်း ဂွမြို့ မကျရှုံးစေရေး အတွက် ဂွမြို့အတွင်းမှာ ရှိတဲ့ တပ်စခန်းတွေမှာ စစ်အင်အား နဲ့ လက်နက်အင်အား ဖြည့်တင်းတာတွေ အပြင် ဂွ နဲ့ ငသိုင်းချောင်းသွားရာ ရိုးလမ်းတလျှောက်မှာလည်း စစ်စခန်းတွေ တိုးချတာ၊ လက်နက်ကြီးတွေ တပ်ဆင်တာတွေကို ဆက်တိုက်လုပ်နေတာတွေလည်းရှိနေတယ်လို့ ဂွမြို့ ဒေသခံသတင်းအရင်းအမြစ်ကပြောပါတယ်။
“လက်ရှိ စစ်ကောင်စီက လက်နက်အင်အား လူအင်အားတိုးချဲ့ချထားတဲ့ နေတွေကတော့ ဂွအခြေစိုက် ခမရ – ၅၆၃ တပ်ရင်းအပါအဝင် ဂွရိုးလမ်းတလျှောက်က ရေနံ့သာအမြောက်တပ်၊ ဗေဒါ ၊ ၁၁မိုင်၊ ဘုရားကုန်း နဲ့ ဂွမြို့ဝင်ဂိတ်ကနေရာတွေမှာ လက်နက်အင်အား လူအင်အားတွေကို တိုးချဲ့ ချထားတာ ဖြစ်တယ်။စစ်ဆေးမှုတွေကလည်း တော်တော်ရှိနေတယ်။အဲဒီရိုးတလျှောက်မှာကလည်း စစ်ကောင်စီက မကြာမကြာ စစ်ကြောင်းထိုးတာတွေ ရှိတယ်လို့ “သူကဆိုပါတယ်။
ရခိုင်ပြည်နယ်မှာ စစ်ကောင်စီနဲ့ အာရက္ခတပ်တော်AAကြား တိုက်ပွဲစတင်ခဲ့တာ ဒီကနေ့မှာ တနှစ်ပြည့်ပြီးဖြစ်သလို ရခိုင်ပြည်နယ်က မြို့နယ် ၁ဝခုနဲ့ ချင်းပြည်နယ်က ပလက်ဝမြို့နယ်တွေကို AAဘက်က သိမ်းပိုက်ထားပြီးဖြစ်ပါတယ်။
လက်ရှိ အပြီးသတ်သိမ်းပိုက်ဖို့ကျန်ရှိနေသေးတဲ့ မြို့နယ်တွေကိုလည်း အာရက္ခတပ်တော်က ဆက်လက်ထိုးစစ်ဆင်တိုက်ခိုက်နေတာလည်းဖြစ်ပါတယ်။
