အာရက္ခဒေသအတွင်းက အမ်း၊ တောင်ကုတ်၊ ဂွနဲ့ မောင်တောမြို့တိုက်ပွဲတွေမှာ စစ်ကောင်စီဘက်က ဝေဟင်ကနေ ခဲယမ်း၊ ရိက္ခာဖြည့်တင်းပေးတာကလွဲပြီး စစ်ကူဖြည့်တင်းပေးနိုင်ခြင်းမရှိဘူးလို့ အာရက္ခတပ်တော်(AA)က ထုတ်ပြန်ပါတယ်။
အမ်း၊ တောင်ကုတ်၊ ဂွနဲ့ မောင်တောမြို့တွေက သိမ်းပိုက်ဖို့ကျန်ရှိနေသေးတဲ့ စစ်ကောင်စီတပ်စခန်းတွေကို အာရက္ခတပ်တော်က ဆက်လက်ထိုးစစ်ဆင်တိုက်ခိုက်နေတာဖြစ်ပြီး၊ စစ်ကောင်စီဘက်က လေကြောင်းပစ်ကူ၊ ရေတပ်ပစ်ကူတွေ အများအပြားအသုံးပြုပြီး ခုခံနေတယ်လို့ ဆိုပါတယ်။
မောင်တောမြို့မှာဆိုရင် စစ်ကောင်စီရဲ့ နခခ ၅စခန်း တစ်ခုသာကျန်ရှိပြီး၊ စစ်ကောင်စီဘက်ကလည်း အဲဒီစခန်းကို မြေပြင်စစ်ကူ မပေးပို့နိုင်တော့တဲ့အတွက် မကြာခင်မှာ သိမ်းပိုက်ရရှိတော့မယ်လို့ AAက အသိပေး ပြောဆိုလာတာဖြစ်ပါတယ်။
အဲဒီလိုပဲအနောက်ပိုင်းတိုင်းစစ်ဌာနချုပ်တည်ရှိရာ အမ်းမြို့နယ်မှာဆိုရင်လည်း စစ်ကောင်စီရဲ့ ဗျူဟာဌာနချုပ်၊ ကာကင်းစခန်းကြီး/ငယ်၊ တပ်ရင်းဌာနချုပ်၊ တပ်ခွဲအသီးသီးပါဝင်တဲ့ ခုခံစစ်ဆင်နွဲနေတဲ့နေရာ ၃၀ကျော်ထဲက အမ်း တပ်စခန်းတွေအားလုံးကို အာရက္ခတပ်တော်က အပြီးသတ်သိမ်းပိုက်ထားပြီး ဆက်လက်သိမ်းပိုက်ဖို့အတွက်နပခ ဌာနချုပ်ဂွင်တစ်ခုသာ ကျန်ရှိတော့တယ်လို့ ဖော်ပြထားပါတယ်။
ဒါ့အပြင် အမ်းဒေသဘက်ကို စစ်ကောင်စီက ရခိုင်ရိုးမဘက်ကနေ စစ်ကူဖြည့်တင်းဖို့ အကြိမ်ကြိမ်ကြိုးစားခဲ့ပေမယ့် အာရက္ခတပ်တော်က အဆင့်ဆင့်ဖြတ်တောက်ပိတ်ဆို့ထားနိုင်ခဲ့တယ်လို့လည်း ထုတ်ပြန်ချက်က ဖော်ပြထားပါတယ်။
နိုဝင်ဘာ ၂၈ရက်နေ့တုန်းကဆိုရင် အမ်းမြို့ကို စစ်ကူပေးဖို့တက်လာတဲ့ စစ်ကောင်စီရဲ့ တပ်မ ၈၈ လက်အောက်ခံ နည်းဗျူဟာတစ်ခုကို အာရက္ခတပ်တော်က အမ်းမြို့မြောက်ဘက် ရိုးတောင်ရဲ့ လမ်းမထက်မှာ ဖြတ်တောက်တိုက်ခိုက်ခဲ့ပြီး နိုဝင်ဘာလ ၃၀ရက်နေ့မှာ ရန်သူ့အလောင်း ၁၀၀ကျော်၊ လက်နက်ခဲယမ်းအများအပြားနဲ့ စစ်သုံ့ပန်းအချို့ဖမ်းမိခဲ့တယ်လို့ AA က အသိပေးထားပါတယ်။
အလားတူ ဂွမြို့ဘက်မှာလည်း စစ်ကူတက်လာတဲ့ စစ်ကောင်စီစစ်ကြောင်းကို အာရက္ခတပ်တော်က နိုဝင်ဘာ ၂၄ရက်နေ့ကစပြီး ဖြတ်တောက်တိုက်ခိုက်ခဲ့ရာ ဂွမြို့နယ် သံခဲချိုင်ကျေးရွာဝန်းကျင်၊ သံခဲချိုင်ကျေးရွာနဲ့ ကင်းပုံကျေးရွာအကြားတို့မှာ ၃ရက်အတွင်း အပြတ်အသတ်ချေမှုန်းတိုက်ခိုက်နိုင်ခဲ့တယ်လို့ ထုတ်ပြန်ထားပါတယ်။
စစ်ကောင်စီက လေကြောင်း၊ ရေကြောင်း၊ Suicide Drone မောင်းသူမဲ့ အသေခံဒရုန်းတွေကို အသုံးပြုပြီးအသည်းအသန် ခုခံကာကွယ်နေတဲ့ကြားက အပြတ်အသတ် ချေမှုန်း တိုက်ခိုက်နိုင်ခဲ့တာလို့လည်း အသိပေးထားပါတယ်။
တောင်ကုတ်မြို့အတွင်းက စစ်ရေးအခြေအနေအသေးစိတ်ကို ထုတ်ပြန်ချက်မှာ ဖော်ပြထားတာမတွေ့ရပေမယ့် အမ်း၊ တောင်ကုတ်၊ ဂွ နဲ့ မောင်တောမြို့တွေ စစ်ကောင်စီရဲ့ လက်ကျန်စခန်းတွေကို အာရက္ခတပ်တော်က ဆက်လက်ထိုးစစ်ဆင် တိုက်ခိုက်နေပြီး တိုက်ပွဲတွေ ပြင်းထန်နေတယ်လို့ AAက ဆိုပါတယ်။
ထိုးစစ်တွေအတွင်း ထူးချွန်ပြောင်မြောက်စွာ တိုက်ပွဲဝင်ခဲ့တဲ့ အာရက္ခစစ်သည်တော်တွေနဲ့ ပေးဆပ်စွန့်လွှတ်ခဲ့တဲ့ အာရက္ခစစ်သည်တော်တွေကို လေးနက်စွာမှတ်တမ်းတင်ဂုဏ်ပြုအပ်ပါတယ်လို့လည်း AAကထုတ်ပြန်ထားပါတယ်။
