မကွေးတိုင်း၊ ငဖဲမြို့နယ်အတွင်းက နတ်ရေကန် လေကြောင်းရန် ကာကွယ်ရေးတပ်ကနေဆုတ်ခွာလာတဲ့ စစ်ကောင်စီရဲ့ ယာဉ်တန်းကိုတိုက်ခိုက်ခဲ့တယ်လို့ ချင်းကာကွယ်ရေးတပ် – အရှို( CDF – Asho )က ထုတ်ပြန်လာပါတယ်။
မနေ့ ဖေဖော်ဝါရီ ၂၂ရက်နေ့၊ နေ့လည်ပိုင်းလောက်မှာနတ်ရေကန် လေကြောင်းရန် ကာကွယ်ရေးတပ်ကနေ ဆုတ်ခွာလာတဲ့ အင်အား ၁၀၀ကျော်ပါ စစ်ကောင်စီယာဉ်တန်းကို ပျဉ်းဝစစ်ဆေးရေးဂိတ် အနောက်ဘက် မီတာ( ၃၀၀၀ ) ခန့်အကွာ နတ်ရေကန်လမ်းဟောင်းမှာ ဖြတ်တောက်တိုက်ခိုက်ခဲ့တာလို့ ဆိုပါတယ်။
အဲ့ဒီတိုက်ခိုက်မှုအတွင်း စစ်ကောင်စီယာဉ်တန်း ၄စီးအနက် ၁စီးမီးလောင်သွားခဲ့ပြီး စစ်ကောင်စီတပ်သား ၇ ဦး ပွဲချင်းပြီး သေဆုံးကာ ထိခိုက်ဒဏ်ရာ ရရှိမှုလည်း များပြားခဲ့တယ်လို့ CDF – Ashoက ထုတ်ပြန်ထားပါတယ်။
ဒါ့အပြင် လက်နက်ငယ်( ၄ )လက်နဲ့ ခဲယမ်းအချို့ကိုလည်းသိမ်းဆည်းရမိခဲ့တယ်လို့ ဆိုပါတယ်။ CDF – Ashoဘက်ကတော့ ရဲဘော် ၁ဦးကျဆုံးခဲ့ရပြီး ၁ဦး(မစိုးရိမ်ရ) ထိခိုက်ဒဏ်ရာ ရရှိခဲ့တယ်လို့ဆိုပါတယ်။
ကျဆုံးခဲ့တဲ့ ရဲဘော်ဟာ စစ်ကောင်စီရဲ့ ယာဉ်တွေကိုရှင်းလင်းရေးဆောင်ရွက်စဉ် ကျဆုံးခဲ့တာလို့ CDF – Ashoကထုတ်ပြန်ထားပေမယ့် အသေးစိတ်ကိုတော့ မဖော်ပြထားပါဘူး။
CDF – Ashoဟာ ဖေဖော်ဝါရီလ ၉ရက်နေ့တုန်းကလည်း ငဖဲမြို့နယ်၊ ပဒါန်းမြို့အနောက်ဘက်က ပျဉ်းဝစစ်ဆေးရေးဂိတ်အနီးမှာ တပ်စွဲထားတဲ့ စစ်ကောင်စီရဲ့ စခန်းကုန်းကို တိုက်ခိုက်သိမ်းပိုက်ခဲ့ပါသေးတယ်။
